ನವದೆಹಲಿ: ಲಾಕ್ ಡೌನ್ ನಿಂದಾಗಿ ದೇಶದ ನಾನಾ ಕಡೆ ಸಿಲುಕಿಕೊಂಡಿರುವ ವಲಸಿಗರಿಗೆ ತಮ್ಮ ಊರಿಗೆ ತೆರಳಲು ರೈಲ್ವೇ ವ್ಯವಸ್ಥೆ ಮಾಡಿರುವ ಕೇಂದ್ರ ಸರ್ಕಾರ ಅವರಿಂದ ಟಿಕೆಟ್ ದರ ಸಂಗ್ರಹಿಸುವಂತೆ ಸೂಚನೆ ನೀಡಿತ್ತು.
ಇದರ ವಿರುದ್ಧ ಟೀಕಾ ಪ್ರಹಾರ ನಡೆಸಿರುವ ವಿಪಕ್ಷ ಕಾಂಗ್ರೆಸ್ ಈಗ ವಲಸಿಗರ ನೆರವಿಗೆ ಮುಂದಾಗಿದೆ. ವಲಸಿಗರ ರೈಲ್ವೇ ಟಿಕೆಟ್ ದರವನ್ನು ಕಾಂಗ್ರೆಸ್ ಭರಿಸಲಿದೆ ಎಂದು ಪಕ್ಷದ ಅಧ್ಯಕ್ಷೆ ಸೋನಿಯಾ ಗಾಂಧಿ ಹೇಳಿದ್ದಾರೆ.
ಬಡ ವಲಸಿಗರಿಂದ ಟಿಕೆಟ್ ದರ ವಸೂಲಿಗೆ ಮುಂದಾದ ಕೇಂದ್ರದ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿರುವ ಸೋನಿಯಾ ಗಾಂಧಿ ಪಿಎಂ ಕೇರ್ ಫಂಡ್ ಮೂಲಕ ಸಾಕಷ್ಟು ದೇಣಿಗೆ ಸಂಗ್ರಹಿಸಲಾಗಿದ್ದರೂ ಕೇಂದ್ರ ಬಡ ಕಾರ್ಮಿಕರ ವಿರುದ್ಧ ಇಂತಹ ಬರೆ ಎಳೆಯುತ್ತಿರುವುದೇಕೆ? ಇದು ದುರದೃಷ್ಟಕರ ಎಂದು ವಾಗ್ದಾಳಿ ನಡೆಸಿದ್ದಾರೆ.
