ಹಾಗಲಕಾಯಿ ಸಿಹಿ ಪಲ್ಯ...

ಹಾಗಲಕಾಯಿ ತನ್ನ ಕಹಿಯ ರುಚಿಯಿಂದ ಸುಮಾರಾಗಿ ಎಲ್ಲರೂ ಇಷ್ಟಪಡದ ತರಕಾರಿಯಾಗಿದೆ. ಆದರೆ ಇದು ಆರೋಗ್ಯಕ್ಕೆ ಬಹಳ ಒಳ್ಳೆಯದು. ಹಾಗಲಕಾಯಿಯ ನಿಯಮಿತ ಸೇವನೆ ಸಕ್ಕರೆ ಕಾಯಿಲೆಯನ್ನು ನಿಯಂತ್ರಿಸುತ್ತದೆ ಎಂದು ಹೇಳುತ್ತಾರೆ.

ಹಾಗಲಕಾಯಿಗೆ ಅದರ ಕಹಿಯ ಪರಿಮಳವೇ ಒಂದು ತರಹದ ವಿಶಿಷ್ಟತೆಯನ್ನು ನೀಡುತ್ತದೆ. ಹಾಗಲಕಾಯಿಯ ಈ ಸಿಹಿ ಪಲ್ಯವು ಅನ್ನದ ಜೊತೆಗೆ ರುಚಿಯಾಗಿರುತ್ತದೆ. ಈ ಹಾಗಲಕಾಯಿ ಪಲ್ಯವನ್ನು ಹೇಗೆ ಮಾಡುವುದು ಎಂದು ತಿಳಿದುಕೊಳ್ಳಲು ಈ ಲೇಖನವನ್ನು ಓದಿ.

ಬೇಕಾಗುವ ಸಾಮಗ್ರಿಗಳು:

ಹಾಗಲಕಾಯಿ - 2

ಹುಣಿಸೆಹಣ್ಣು - 1 ಚಿಕ್ಕ ನಿಂಬೆಗಾತ್ರ

ಬೆಲ್ಲ - 1 ದೊಡ್ಡ ನಿಂಬೆಗಾತ್ರ

ಹಸಿಮೆಣಸು - 1

ಅರಿಶಿಣ - 2 ಚಮಚ

ರಸಂ ಪುಡಿ - 1 ಚಮಚ

ಉಪ್ಪು - ರುಚಿಗೆ

ಸಾಸಿವೆ - 1 ಚಮಚ

ಉದ್ದಿನಬೇಳೆ - 1 ಚಮಚ

ಕೆಂಪು ಮೆಣಸು - 2

ಕರಿಬೇವು - ಸ್ವಲ್ಪ

ಎಣ್ಣೆ - 3-4 ಚಮಚ

ಮಾಡುವ ವಿಧಾನ:

ಹಾಗಲಕಾಯಿಯನ್ನು ಚಿಕ್ಕದಾಗಿ ಹೆಚ್ಚಿಕೊಳ್ಳಿ. ಅದಕ್ಕೆ 1 ಚಮಚ ಉಪ್ಪು ಮತ್ತು 1 ಚಮಚ ಅರಿಶಿಣವನ್ನು ಹಾಕಿ ಮಿಕ್ಸ್ ಮಾಡಿ 15-20 ನಿಮಿಷ ಹಾಗೆಯೇ ಬಿಡಿ. ನಂತರ ಸ್ವಲ್ಪ ನೀರನ್ನು ಸೇರಿಸಿ ಅದನ್ನು ಹಿಂಡಿ ನೀರನ್ನು ಬೇರ್ಪಡಿಸಿ. ಇದು ಹಾಗಲಕಾಯಿಯ ಕಹಿಯನ್ನು ಕಡಿಮೆ ಮಾಡಲು ಸಹಾಯ ಮಾಡುತ್ತದೆ. ಹುಣಸೆ ಹಣ್ಣನ್ನು ನೀರಿನಲ್ಲಿ ನೆನೆಸಿ ಹಿಂಡಿ ರಸವನ್ನು ಬೇರ್ಪಡಿಸಿಕೊಳ್ಳಿ.

ಒಂದು ಪ್ಯಾನ್ ತೆಗೆದುಕೊಂಡು ಅದರಲ್ಲಿ 3-4 ಚಮಚ ಎಣ್ಣೆಯನ್ನು ಹಾಕಿ ಅದು ಬಿಸಿಯಾದಾಗ ಸಾಸಿವೆ, ಉದ್ದಿನಬೇಳೆ, ಹಸಿಮೆಣಸು, ಕೆಂಪು ಮೆಣಸು, ಕರಿಬೇವು, 1 ಚಮಚ ಅರಿಶಿಣ ಮತ್ತು ರಸಂ ಪುಡಿಯನ್ನು ಕ್ರಮವಾಗಿ ಸೇರಿಸಿ ಹುರಿದು ಅದಕ್ಕೆ ಹೆಚ್ಚಿದ ಹಾಗಲಕಾಯಿಯನ್ನು ಸೇರಿಸಿ ಹುರಿಯಿರಿ. ಹಾಗಲಕಾಯಿ ಚೆನ್ನಾಗಿ ಹುರಿದು ಹೊಂಬಣ್ಣಬರುವವರೆಗೂ ಹುರಿಯಿರಿ. ಈಗ ಇದಕ್ಕೆ ಹುಣಿಸೆ ಹಣ್ಣಿನ ರಸ, ಬೆಲ್ಲ ಮತ್ತು ರುಚಿಗೆ ತಕ್ಕಷ್ಟು ಉಪ್ಪನ್ನು ಸೇರಿಸಿ 5 ನಿಮಿಷ ಹುರಿದರೆ ಹಾಗಲಕಾಯಿ ಪಲ್ಯ ರೆಡಿ.

ಆರೋಗ್ಯಕ್ಕೂ ಉತ್ತಮವಾಗಿರುವ ಈ ಹಾಗಲಕಾಯಿ ಪಲ್ಯವನ್ನು ನೀವೂ ಒಮ್ಮೆ ಮಾಡಿ ನೋಡಿ.

ತಾಜಾ ಸುದ್ದಿಗಳನ್ನು ಓದಲು ವೆಬ್‌ದುನಿಯಾ ಮೊಬೈಲ್ ಆ್ಯಪ್ ಡೌನ್‍ಲೋಡ್ ಮಾಡಿಕೊಳ್ಳಿ.