ಮಕ್ಕಳು ಮಲಗಿದ್ದಾಗ ದಂಪತಿಗಳ ಮಧ್ಯೆ ವಾಗ್ವಾದ ನಡೆದು ಕೋಪದ ಭರದಲ್ಲಿ ಪತಿ ತನ್ನ ಪತ್ನಿಯ ತಲೆಯ ಮೇಲೆ ಕಬ್ಬಿಣದ ಮೊಳೆಯನ್ನು ಜಡಿದು ಪರಾರಿಯಾಗಿದ್ದಾನೆ ಎನ್ನಲಾಗಿದೆ. ಇದೀಗ ಪೊಲೀಸರು ಆರೋಪಿಯನ್ನು ಬಂಧಿಸಿದ್ದಾರೆ.
ಪತ್ನಿಯ ನಡತೆಯ ಬಗ್ಗೆ ಸಂಶಯಪಿಶಾಚಿಯಾಗಿದ್ದ ಪತಿಯೊಬ್ಬ ಪತ್ನಿಯ ತಲೆಯ ಮೇಲೆ 5 ಇಂಚ್‌ನ ಮೊಳೆಯನ್ನು ಜಡಿದ ವಿಚಿತ್ರ ಘಟನೆ ದಕ್ಷಿಣ ಪೂರ್ವ ದೆಹಲಿಯ ಸಂಗಮ್ ವಿಹಾರ್ ಪ್ರದೇಶದಲ್ಲಿ ನಡೆದಿದೆ.
ವರದಿಗಳ ಪ್ರಕಾರ, ಘಟನೆಯ ನಂತರ 27 ವರ್ಷ ವಯಸ್ಸಿನ ಮಮತಾ ಕೋಮಾಗೆ ತಲುಪಿದ್ದು, ಆರೋಪಿ ಪತಿ ಪಪ್ಪುನನ್ನು ಪೊಲೀಸರು ಬಂಧಿಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ.
ಬಟ್ಟೆಯಿಂದ ಪತ್ನಿಯ ಕಾಲು ಮತ್ತು ಕೈಗಳನ್ನು ಕಟ್ಟಿಹಾಕಿ ನಂತರ ಕಬ್ಬಿಣ ಮೊಳೆ ಮತ್ತು ಸುತ್ತಿಗೆಯನ್ನು ತಂದು ತಲೆಗೆ ಮೊಳೆಯನ್ನು ಸುತ್ತಿಗೆಯಿಂದ ಜಡಿದು ಮನೆಯ ಬಾಗಿಲನ್ನು ಹೊರಗಡೆಯಿಂದ ಹಾಕಿ ಪರಾರಿಯಾಗಿದ್ದಾನೆ ಎಂದು ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ.
ತಾಯಿ ರಕ್ತದ ಮಡುವಿನಲ್ಲಿ ಬಿದ್ದಿರುವುದನ್ನು ಕಂಡ ಮಕ್ಕಳು ರಾತ್ರಿಯಿಡಿ ಅಳುತ್ತಾ ಕುಳಿತಿವೆ. ಬೆಳಿಗ್ಗೆ ಮನೆಯ ಮಾಲೀಕ ಮಕ್ಕಳು ಅಳುತ್ತಿರುವುದನ್ನು ನೋಡಿದಾಗ ಘಟನೆಯ ಮಾಹಿತಿ ದೊರೆತಿದೆ. ಕೂಡಲೇ ಮಹಿಳೆಯನ್ನು ಆಸ್ಪತ್ರೆಗೆ ಸೇರಿಸಲಾಗಿದ್ದು, ಆಕೆಯ ಸ್ಥಿತಿ ಗಂಭೀರವಾಗಿದೆ ಎಂದು ವೈದ್ಯರು ತಿಳಿಸಿದ್ದಾರೆ.