ಕ್ರಿಕೆಟ್ ಕಾಶಿ ಲಾರ್ಡ್ಸ್ ನಲ್ಲಿ ಪಂದ್ಯ ಗೆದ್ದು ಗೆಳೆಯ ಧ್ರುವನಿಗೆ ಅರ್ಪಿಸಿದ ಕಿಚ್ಚ ಸುದೀಪ್

ಲಂಡನ್: ಸ್ಯಾಂಡಲ್ ವುಡ್ ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ಕಾರ್ಪೋರೇಟ್ ಕ್ರಿಕೆಟ್ ಡೇ ಟೂರ್ನಮೆಂಟ್ ನಲ್ಲಿ ಆಡಿ ಗೆದ್ದು ಆ ಗೆಲುವನ್ನು ಕೆಲವು ತಿಂಗಳುಗಳ ಹಿಂದೆ ತೀರಿಕೊಂಡ ಗೆಳೆಯ, ಸಹ ಆಟಗಾರ ಧ್ರುವನಿಗೆ ಅರ್ಪಿಸಿದ್ದಾರೆ.

ಕ್ರಿಕೆಟ್ ಕಾಶಿ ಎಂದೇ ಕರೆಯಿಸಿಕೊಳ್ಳುವ ಇಂಗ್ಲೆಂಡ್ ನ ಲಾರ್ಡ್ಸ್ ಮೈದಾನದಲ್ಲಿ ಕಿಚ್ಚ ಸುದೀಪ್ ನೇತೃತ್ವದ ತಂಡ ಆಡಿ ಗೆದ್ದಿದೆ. ಈ ಗೆಲುವಿನ ಸಂಭ್ರಮವನ್ನು ತಮ್ಮ ಟ್ವಿಟರ್ ಪೇಜ್ ನಲ್ಲಿ ಪ್ರಕಟಿಸಿರುವ ಕಿಚ್ಚ ಸುದೀಪ್ ಪಂದ್ಯ ಆಯೋಜಿಸಿದ ಲಾರ್ಡ್ಸ್ ವ್ಯವಸ್ಥಾಪಕರಿಗೆ ಧನ್ಯವಾದ ಸಲ್ಲಿಸಿದ್ದಾರೆ.

ಕಿಚ್ಚ ಸುದೀಪ್ ನೇತೃತ್ವದ ತಂಡದಲ್ಲಿ ಕರ್ನಾಟಕ ಬುಲ್ಡೋಜರ್ಸ್ ತಂಡದ ಪ್ರದೀಪ್, ರಾಜೀವ್ ಮತ್ತಿತರರು ಇದ್ದಾರೆ. ಕಳೆದ ವರ್ಷವೂ ಕಿಚ್ಚನ ತಂಡ ಇಲ್ಲಿ ಆಡಿ ಗೆದ್ದಿತ್ತು. ಆಗ ತಂಡದಲ್ಲಿ ಧ್ರುವ ಕೂಡಾ ಆಡಿದ್ದರು.

ಆದರೆ ಈ ಬಾರಿ ಆಡಲು ಅವರೇ ಇಲ್ಲ. ಕೆಲವು ತಿಂಗಳುಗಳ ಹಿಂದೆ ವೈಯಕ್ತಿಕ ಕಾರಣಗಳಿಂದ ಧ್ರುವ ಆತ್ಮಹತ್ಯೆ ಮಾಡಿಕೊಂಡಿದ್ದರು. ಹೀಗಾಗಿ ಈ ಗೆಲುವನ್ನು ಸುದೀಪ್, ಧ್ರುವನಿಗೆ ಅರ್ಪಿಸಿದ್ದಾರೆ.