ಬೆಂಗಳೂರು: ನಟಿ ಹರ್ಷಿಕಾ ಪೂಣಚ್ಚ ಮತ್ತು ಭುವನ್ ಪೊನ್ನಣ್ಣ ಇದೇ ವಾರಂತ್ಯಕ್ಕೆ ವೈವಾಹಿಕ ಜೀವನಕ್ಕೆ ಕಾಲಿಡುತ್ತಿದ್ದಾರೆ.
ತಮ್ಮ ತವರು ಕೊಡಗಿನಲ್ಲಿ ಅಲ್ಲಿನ ಸಂಪ್ರದಾಯದಂತೇ ಇಬ್ಬರೂ ವಿವಾಹವಾಗಲಿದ್ದಾರೆ. ಇದಕ್ಕೆ ಮೊದಲು ಭುವನ್ ತಮ್ಮ ಪ್ರೀತಿಯ ಹುಡುಗಿಗೆ ಕೊಟ್ಟ ಮಾತಿನಂತೇ ಮನೆ ಗಿಫ್ಟ್ ಮಾಡಿದ್ದಾರೆ. ಹರ್ಷಿಕಾ ಹಿಂದೊಮ್ಮೆ ನಾವು ಮದುವೆಯಾಗುವಾಗ ನಿನ್ನದೇ ಸ್ವಂತ ದುಡಿಮೆಯಲ್ಲಿ ಮನೆ ಮಾಡಿರಬೇಕು ಎಂದಿದ್ದರಂತೆ. ಅದನ್ನು ಇತ್ತೀಚೆಗೆ ಅವರೇ ಪತ್ರಿಕಾಗೋಷ್ಠಿಯಲ್ಲಿ ಹೇಳಿಕೊಂಡಿದ್ದರು.
ಅದರಂತೆ ಈಗ ಹರ್ಷಿಕಾಗೆ ತಾವು ಪ್ರೀತಿಯಿಂದ ತಮ್ಮದೇ ದುಡಿಮೆಯಿಂದ ಕಟ್ಟಿಸಿದ ತೋಟದ ಮನೆಯನ್ನು ಉಡುಗೊರೆಯಾಗಿ ಕೊಟ್ಟಿದ್ದಾರೆ ಭುವನ್. ಇದರ ಗೃಹಪ್ರವೇಶವನ್ನೂ ಮಾಡಿದ್ದಾರೆ. ಇನ್ನು, ಹರ್ಷಿಕಾ ಮನೆಯಲ್ಲಿ ಈಗಾಗಲೇ ಮದುವೆ ಶಾಸ್ತ್ರಗಳು ಆರಂಭವಾಗಿದ್ದು, ಅಪ್ಪಟ ಕೊಡಗಿನ ಶೈಲಿಯಲ್ಲಿ ಸೀರೆಯುಟ್ಟು ಮಿಂಚುತ್ತಿರುವ ಹರ್ಷಿಕಾ ಮೊಗದಲ್ಲಿ ಮದುವಣಗಿತ್ತಿಯ ಕಳೆ ಬಂದಿದೆ.
