ಗುಡ್ ನ್ಯೂಸ್ ಕೊಟ್ಟ ಸೈನಾ ನೆಹ್ವಾಲ್!

ಹೈದರಾಬಾದ್: ಸೈನಾ ನೆಹ್ವಾಲ್ ತಮ್ಮ ಮೊದಲ ಕೋಚ್ ಗೋಪಿಚಂದ್ ಜತೆಗೆ ಮುನಿಸಿಕೊಂಡು ವಿಮಲ್ ಕುಮಾರ್ ಬಳಿ ಹೋದ ಮೇಲೆ ಯಾಕೋ ಮಂಕಾಗಿದ್ದರು. ಸತತ ಗಾಯ, ಫಾರ್ಮ್ ವೈಫಲ್ಯದಿಂದಾಗಿ ಸೈನಾ ಶೈನ್ ಕಳೆದುಕೊಂಡಿದ್ದರು.

ಆದರೆ ಇದೀಗ ಪಿವಿ ಸಿಂಧು ಮಿಂಚುತ್ತಿರುವುದನ್ನು ನೋಡಿ ಸೈನಾಗೆ ಮತ್ತೆ ಮುನಿಸು ಮರೆಯುವ ಮನಸ್ಸಾಗಿರಬೇಕು. ಇದೀಗ ಮತ್ತೆ ಗೋಪಿಚಂದ್ ಅಕಾಡೆಮಿಯಲ್ಲಿ ತರಬೇತಿ ಪಡೆಯಲು ಶುರು ಮಾಡಿಕೊಂಡಿದ್ದಾರೆ.

ಕಳೆದ ವಾರ ಸಿಂಧು ವಿಶ್ವ ಬ್ಯಾಡ್ಮಿಂಟನ್ ಚಾಂಪಿಯನ್ ಶಿಪ್ ಫೈನಲ್ ಆಡುವಾಗ ಸಿಂಧು ಕೋಚ್ ಆಗಿರುವ ಗೋಪಿಚಂದ್ ಜತೆಗೆ ಸೈನಾ ಮಾತನಾಡಿದ್ದು ಸುದ್ದಿಯಾಗಿತ್ತು. ಅದು ಅವರಿಬ್ಬರ ನಡುವಿನ ಮುನಿಸು ಮರೆಯಾಗಿದೆ ಎಂಬುದಕ್ಕೆ ಸಾಕ್ಷಿಯಾಗಿತ್ತು. ಕೊನೆಗೂ ಸೈನಾ ಮತ್ತೆ ಗೋಪಿಚಂದ್ ಅಕಾಡೆಮಿಗೆ ತರಬೇತಿಗೆ ಕಾಲಿಡುವುದರೊಂದಿಗೆ ಈ ಯಶಸ್ವೀ ಜೋಡಿ ಒಂದಾಗುತ್ತಿರುವ ಸೂಚನೆ ಸಿಕ್ಕಿದೆ.

ಇದು ಭಾರತದ ಪಾಲಿಗೆ ನಿಜಕ್ಕೂ ಡಬಲ್ ಧಮಾಕವೇ! ಈಗಾಗಲೇ ಗೋಪಿಚಂದ್ ಗರಡಿಯಲ್ಲಿ ಪಳಗಿರುವ ಸಿಂಧು ವಿಶ್ವ ಮಟ್ಟದಲ್ಲಿ ಸದ್ದು ಮಾಡುತ್ತಿದ್ದಾರೆ. ಇದೀಗ ಒಂದೊಮ್ಮೆ ವಿಶ್ವ ನಂ.1 ಸ್ಥಾನಕ್ಕೇರಿದ್ದ ಸೈನಾ ಮತ್ತೆ ತಮ್ಮ ಹಳೆಯ ಕೋಚ್ ಗೋಪಿಚಂದ್ ಗರಡಿಗೆ ಬಂದಿರುವುದರಿಂದ ಭಾರತದ ಇಬ್ಬರು ಸ್ಟಾರ್ ಗಳು ವಿಶ್ವ ಮಟ್ಟದಲ್ಲಿ ಪ್ರಳಯಾಂತಕರಾಗುವ ಸೂಚನೆ ನೀಡಿದ್ದಾರೆ.

ಇದನ್ನೂ ಓದಿ.. ಪ್ರೇಮದಾಸ ಕ್ರೀಡಾಂಗಣದಲ್ಲಿ ಚಾಲಕನಾದ ಧೋನಿ

ತಾಜಾ ಸುದ್ದಿಗಳನ್ನು ಓದಲು ವೆಬ್‌ದುನಿಯಾ ಮೊಬೈಲ್ ಆ್ಯಪ್ ಡೌನ್‍ ಲೋಡ್ ಮಾಡಿಕೊಳ್ಳಿ