ವಿನೋದ್ ಕಾಂಬ್ಳಿ ಎನ್ನಲಾದ ತೂರಾಡುತ್ತಿದ್ದ ವಿಡಿಯೋ ವೈರಲ್: ಮನೆಗೆ ಭೇಟಿ ನೀಡಿದ ಸ್ನೇಹಿತರು ಹೇಳಿದ್ದೇನು

Photo Courtesy X

ಮುಂಬೈ: ಭಾರತದ ಮಾಜಿ ಕ್ರಿಕಟರ್ ವಿನೋದ್ ಕಾಂಬ್ಳಿ ಅವರು ಅನಾರೋಗ್ಯದಿಂದ ನಡೆಯಲಾಗದ ಸ್ಥಿತಿಯಲ್ಲಿರುವ ಅವರದ್ದು ಎನ್ನಲಾದ ವಿಡಿಯೋವೊಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆದ ಬೆನ್ನಲ್ಲೇ ಈ ಬಗ್ಗೆ ಅವರ ಸ್ನೇಹಿತರು ಸ್ಪಷ್ಟನೆ ನೀಡಿದ್ದಾರೆ.

ವಿಡಿಯೋದಲ್ಲಿ ಕಾಂಬ್ಳಿ ಅವರಿಗೆ ನಡೆಯಲು ಸಾಧ್ಯವಾಗದೆ ಬೇರೆಯವರ ಸಹಾಯದಲ್ಲಿ ನಡೆದಾಡುತ್ತಿರುವುದನ್ನು ಕಾಣಬಹುದು. ಭಾರತ ಖ್ಯಾತ ಕ್ರಿಕೆಟರ್ ಒಬ್ಬರನ್ನು ಈ ಪರಿಸ್ಥಿತಿಯಲ್ಲಿ ನೋಡಲು ತುಂಬಾನೇ ಕಷ್ಟವಾಗುತ್ತದೆ. ಅತಿಯಾದ ಮದ್ಯಪಾನ ಸೇವನೆ ಏನ್ ಬೇಕಾದ್ರು ಮಾಡಬಹುದು ಎಂದು ವಿಡಿಯೋವನ್ನು ವೈರಲ್ ಮಾಡಲಾಗಿತ್ತು.  ಇದರಿಂದ ಅಭಿಮಾನಿಗಳು ವಿನೋದ್‌ ಕಾಂಬ್ಳಿ ಅವರ ಪರಿಸ್ಥಿತಿಯನ್ನು ನೋಡಿ ಶಾಕ್‌ ಆಗಿದ್ದರು. ಇದೀಗ ಈ ಸಂಬಂಧ ಅವರ ಸ್ನೇಹಿತರು ಅವರೊಂದಿಗಿನ ಫೋಟೋ ಹಂಚಿ, ಕಾಂಬ್ಳಿ ಚೆನ್ನಾಗಿದ್ದಾರೆ ಎಂದು ಬರೆದುಕೊಂಡಿದ್ದಾರೆ.

ನಾನು ಚೆನ್ನಾಗಿಯೇ ಇದ್ದೇನೆ ಮತ್ತು ಫಿಟ್ ಆಗಿದ್ದೇನೆ: ವಿನೋದ್ ಕಾಂಬ್ಳಿ ತಮ್ಮ ಆಪ್ತರಿಗೆ ಹೇಳಿದ್ದಾರೆ. ಅವರ ಸ್ನೇಹಿತರು ಕಾಂಬ್ಳಿ ಅವರನ್ನು ಭೇಟಿಯಾದ ವೇಳೆ ಉತ್ಸಾಹದಲ್ಲಿರುವುದನ್ನು ಅವರು ನೋಡಿದ್ದಾರೆ. ಕಾಂಬ್ಳಿ ಅವರು 'ಫಿಟ್ ಮತ್ತು ಫೈನ್' ಎಂದು ಅವರಿಗೆ ಭರವಸೆ ನೀಡಿತ್ತಿರುವುದನ್ನು ಕಾಣಬಹುದು.

ನನ್ನ ಆರೋಗ್ಯದಲ್ಲಿ ಯಾವುದೇ ತರಹದ ಸಮಸ್ಯೆಯಾಗಿಲ್ಲ. ಸೋಶಿಯಲ್​ ಮೀಡಿಯಾದಲ್ಲಿ ಬರುವ ವಿಡಿಯೋವನ್ನು ನಂಬಬೇಡಿ ಎಂದು ತಮ್ಮ ಶಾಲಾ ಸಹಪಾಠಿ ರಿಕ್ಕಿ ಹಾಗೂ ಪ್ರಥಮ ದರ್ಜೆ ಕ್ರಿಕೆಟ್‌ನ ಅಂಪೈರ್ ಮಾರ್ಕಸ್‌ ಅವರ ಬಳಿ ಹೇಳುತ್ತಿರುವುದನ್ನು ನೋಡಬಹುದಾಗಿದೆ. ಇದರಿಂದ ವಿನೋದ್ ಲಾಂಬ್ಳಿ ಅವರ ಬಗ್ಗೆ ಹರಿದಾಡುತ್ತಿರುವ ಊಹಪೋಹ ಸುದ್ದಿಗೆ ಅವರು ಸ್ಪಷ್ಟನೆ ನೀಡಿದ್ದಾರೆ.