ಕಳ್ಳತನ ಮಾಡಲು ಮನೆಗೆ ನುಗ್ಗಿದ ಕಳ್ಳ ಆಮೇಲೆ ಮಾಡಿದ್ದೇನು ಗೊತ್ತಾ?

ಮಂಗಳೂರು : ಮನೆಗೆ ನುಗ್ಗಿದ ಕಳ್ಳನೊಬ್ಬ ಕಳ್ಳತನ ಮಾಡುವ ಬದಲು ಮನೆಯ ಸೋಫಾದ ಮೇಲೆ ಮಲಗಿ ನಿದ್ರೆ ಮಾಡಿ ಮನೆ ಮಾಲೀಕನ ಕೈಗೆ ಸಿಕ್ಕಿಬಿದ್ದ ಘಟನೆ ದಕ್ಷಿಣ ಕನ್ನಡ ಜಿಲ್ಲೆಯ ಉಪ್ಪಿನಂಗಡಿಯಲ್ಲಿ ನಡೆದಿದೆ.

ಸುದರ್ಶನ ಎಂಬುವವರ ಮನೆಯಲ್ಲಿ ಕಳ್ಳತನ ಮಾಡುವ ಉದ್ದೇಶದಿಂದ ಬಿಹಾರದ ಮೂಲದ ಕಳ್ಳ ಅನಿಲ್ ಸಹಾನಿ ಎಂಬಾತ ಮನೆ ನುಗ್ಗಿದ್ದಾನೆ. ಆದರೆ ಬೀಗದ ಕೀಯನ್ನು ಕೈಯಲ್ಲಿ ಹಿಡಿದ ಕಳ್ಳ ಕಳ್ಳತನ ಮಾಡದೆ ಸೋಫಾದ ಮೇಲೆ ಮಲಗಿ ಬೆಳಿಗ್ಗೆಯವರೆಗೂ ನಿದ್ರೆ ಮಾಡಿ ಮನೆ ಮಾಲೀಕನ ಕೈಗೆ ಸಿಕ್ಕಿಬಿದ್ದಿದ್ದಾನೆ.

ಕಳ್ಳ ಕಳ್ಳತನ ಮಾಡದೆ ನಿದ್ರೆ ಮಾಡಿರುವುದನ್ನು ಕಂಡು ಎಲ್ಲರೂ ಅಚ್ಚರಿಗೊಂಡಿದ್ದು, ಇದು ಮಾಲೀಕನ ಮನೆಯಲ್ಲಿರುವ ಕಲ್ಲುರ್ಟಿ ಮತ್ತು ಗುಳಿಗ ದೈವದ ಪವಾಡ ಎಂದು ಸ್ಥಳೀಯರು ಹೇಳುತ್ತಿದ್ದಾರೆ. ಕಳ್ಳನನ್ನು ಉಪ್ಪಿನಂಗಡಿ ಪೊಲೀಸರ ವಶಕ್ಕೆ ನೀಡಲಾಗಿದೆ.