ನನ್ನನ್ನು ದೇವಸ್ಥಾನದಲ್ಲಿ ಬಾಗಿಲಲ್ಲಿ ನಿಲ್ಲಿಸಿ ಜಾತಿ ಕೇಳಿದ್ರು: ನಟಿ ನಮಿತಾ ಗಂಭೀರ ಆರೋಪ

Photo Credit: Facebook

ಚೆನ್ನೈ: ನನ್ನನ್ನು ದೇವಸ್ಥಾನದ ಬಾಗಿಲಲ್ಲಿ ನಿಂತು ಜಾತಿ ಕೇಳಿದ್ರು ಎಂದು ಮಾದಕ ನಟಿ ನಮಿತಾ ಮಾಧ್ಯಮಗಳ ಮುಂದೆ ಗಂಭೀರ ಆರೋಪ ಮಾಡಿದ್ದಾರೆ. ಮಧುರೈ ಮೀನಾಕ್ಷಿ ದೇವಸ್ಥಾನಕ್ಕೆ ಹೋದಾಗ ಈ ಘಟನೆ ನಡೆದಿದೆ ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ.

ಪತಿ ವೀರೇಂದ್ರ ಜೊತೆ ನಮಿತಾ ದೇವಸ್ಥಾನಕ್ಕೆ ತೆರಳಿದ್ದಾರೆ. ಈ ವೇಳೆ ಬಾಗಿಲಲ್ಲೇ ತಡೆದು ನೀವು ಹಿಂದೂ ಎಂದು ಸಾಬೀತುಪಡಿಸಿ, ಜಾತಿ ಪ್ರಮಾಣ ಪತ್ರ ನೀಡಿ ಎಂದು ಕೇಳಿದರು ಎಂದು ನಮಿತಾ ಆರೋಪ ಮಾಡಿದ್ದಾರೆ. ಕೃಷ್ಣ ಜನ್ಮಾಷ್ಠಮಿ ನಿಮಿತ್ತ ದೇವಾಲಯಕ್ಕೆ ತೆರಳಿದಾಗ ಈ ಘಟನೆ ನಡೆದಿದೆ ಎಂದು ಅವರು ಹೇಳಿಕೊಂಡಿದ್ದಾರೆ.

ದೇವಸ್ಥಾನಕ್ಕೆ ತೆರಳುವ ಒಂದು ದಿನ ಮುಂಚಿತವಾಗಿಯೇ ತಿಳಿಸಲಾಗಿದೆ. ಜನ ಸೇರಿ ಬೇರೆಯವರಿಗೆ ತೊಂದರೆಯಾಗುವುದು ಬೇಡ ಎಂಬ ಕಾರಣಕ್ಕೆ ಮೊದಲೇ ತಿಳಿಸಿದ್ದೆವು. ಆ ದಿನ ನಾವು ಮಾಸ್ಕ್ ಹಾಕಿಕೊಂಡು ಜನ ಗುರುತಿಸುವುದು ಬೇಡ ಎಂದು ದೇವಸ್ಥಾನಕ್ಕೆ ಬಂದೆವು. ಆದರೆ ಬಾಗಿಲಲ್ಲೇ ಜಾತಿ ಪ್ರಮಾಣ ಪತ್ರ ನೀಡಿ ಎಂದು 20 ನಿಮಿಷ ಕಾಯಿಸಲಾಯಿತು.

ಇದುವರೆಗೆ ದೇಶದ ಯಾವುದೇ ದೇವಸ್ಥಾನದಲ್ಲಿ ನಮಗೆ ಈ ಅನುಭವವಾಗಿರಲಿಲ್ಲ. ನಾನು ಹಿಂದೂ ಕುಟುಂಬದಲ್ಲಿ ಹುಟ್ಟಿದವಳು. ನಮ್ಮ ಮದುವೆ ನಡೆದಿದ್ದು ತಿರುಪತಿಯಲ್ಲಿ. ಮಕ್ಕಳಿಗೆ ಕೃಷ್ಣನ ಹೆಸರಿಟ್ಟಿದ್ದೇವೆ. ಇದೆಲ್ಲಾ ಗೊತ್ತಿದ್ದೂ ದೇವಸ್ಥಾನದ ಸಿಬ್ಬಂದಿ ನಮ್ಮ ಜೊತೆ ಒರಟಾಗಿ ವರ್ತಿಸಿದ್ದಾರೆ ಎಂದು ನಮಿತಾ ಆರೋಪಿಸಿದ್ದಾರೆ.