ಬೆಂಗಳೂರು: ಬಿಗ್ ಬಾಸ್ ಕನ್ನಡ ಫೈನಲ್ ವೇದಿಕೆಯಲ್ಲಿ ಅಮ್ಮನ ಹಾಡಿಗೆ ಅದ್ಭುತವಾಗಿ ಡ್ಯಾನ್ಸ್ ಮಾಡಿದ ಹುಡುಗನಿಗೆ ವೇದಿಕೆಯಲ್ಲೇ ಕಿಚ್ಚ ಸುದೀಪ್ ಬೆಲೆ ಕಟ್ಟಲಾಗದ ಉಡುಗೊರೆ ಕೊಟ್ಟರು.
ಕಿಚ್ಚ ಸುದೀಪ್ ಇತ್ತೀಚೆಗಷ್ಟೇ ತಾಯಿಯನ್ನು ಕಳೆದುಕೊಂಡಿದ್ದಾರೆ. ಅದೂ ಬಿಗ್ ಬಾಸ್ ಶೋ ನಡೆಸಿಕೊಡುತ್ತಿರುವಾಗಲೇ ಅವರ ತಾಯಿ ಪ್ರಾಣ ಬಿಟ್ಟಿದ್ದರು. ಹೀಗಾಗಿ ಬಿಗ್ ಬಾಸ್ ಫೈನಲ್ ವೇದಿಕೆಯಲ್ಲಿ ಕಿಚ್ಚನಿಗಾಗಿಯೇ ಅಮ್ಮನ ಕುರಿತಾ ಹಾಡೊಂದಕ್ಕೆ ಡ್ಯಾನ್ಸ್ ಮಾಡಿಸಲಾಗಿತ್ತು.
ಈ ನೃತ್ಯ ನೋಡುತ್ತಿದ್ದಂತೇ ಕಿಚ್ಚ ಸುದೀಪ್ ಗಳ ಗಳನೆ ಅತ್ತುಬಿಟ್ಟರು. ಅವರ ಜೊತೆಗೆ ಶೋ ನೋಡಲು ಬಂದಿದ್ದ ಸುದೀಪ್ ತಂದೆ ಸಂಜೀವ್ ಮತ್ತು ಮಗಳು ಸಾನ್ವಿ ಕೂಡಾ ಅಳುತ್ತಲೇ ಇದ್ದರು. ಈ ಹಾಡು ಸುದೀಪ್ ಹೃದಯವನ್ನು ತಟ್ಟಿತ್ತು.
ಹೀಗಾಗಿ ಡ್ಯಾನ್ಸ್ ಮುಗಿದೊಡನೆ ವೇದಿಕೆಗೆ ಬಂದ ಕಿಚ್ಚ ಸುದೀಪ್ ಭಾವುಕರಾಗಿ ಆ ಹುಡುಗನನ್ನು ಎತ್ತಿ ಮುದ್ದಾಡಿದ್ದಾರೆ. ಅಷ್ಟೇ ಅಲ್ಲ ಆ ಹುಡುಗನಿಗೆ ತಮ್ಮ ಕೈಯಲ್ಲಿದ್ದ ಬ್ರೇಸ್ ಲೆಟ್ ನ್ನೇ ಬಿಚ್ಚಿಕೊಟ್ಟಿದ್ದಾರೆ. ಈ ಬ್ರೇಸ್ ಲೆಟ್ ಸದಾ ಕಿಚ್ಚನ ಕೈಯಲ್ಲೇ ಇರುತ್ತದೆ. ಆದರೆ ತಮ್ಮ ಅಮ್ಮನ ಬಗ್ಗೆ ಡ್ಯಾನ್ಸ್ ಮಾಡಿ ಉಡುಗೊರೆ ಕೊಟ್ಟ ಹುಡುಗನಿಗೆ ಬೆಲೆ ಕಟ್ಟಲಾಗದ ಉಡುಗೊರೆ ಕೊಟ್ಟು ತಮ್ಮ ಮೆಚ್ಚುಗೆ ಸೂಚಿಸಿದ್ದಾರೆ.
