ನವದೆಹಲಿ: ಪನಾಮಾ ಪೇಪರ್ಸ್ ನಂತಹದ್ದೇ ಮತ್ತೊಂದು ಪ್ಯಾರಾಡೈಸ್ ಪೇಪರ್ಸ್ ಮೂಲಕ ತೆರಿಗೆ ವಂಚಕರ ಪಟ್ಟಿ ಬಿಡುಗಡೆ ಮಾಡಿರುವ ಅಂತಾರಾಷ್ಟ್ರೀಯ ತನಿಖಾ ಪತ್ರಕರ್ತರ ಒಕ್ಕೂಟ ಇದರಲ್ಲಿ ಭಾರತದ ಪ್ರಮುಖರ ಹೆಸರನ್ನೂ ಉಲ್ಲೇಖಿಸಿದೆ.
ಪನಾಮಾ ಪೇಪರ್ಸ್ ನಿಂದ ಪಾಕ್ ಪ್ರಧಾನಿ ನವಾಜ್ ಶರೀಫ್ ಅಧಿಕಾರ ಕಳೆದುಕೊಂಡಿದ್ದರು. ಪನಾಮಾ ಪೇಪರ್ಸ್ ಬಹಿರಂಗಗೊಂಡಾಗ ಬಾಲಿವುಡ್, ಭಾರತದ ರಾಜಕೀಯ ನಾಯಕರು ಸೇರಿದಂತೆ ತೆರಿಗೆ ವಂಚನೆ ಮಾಡಿದ ಹಲವು ಅಂತಾರಾಷ್ಟ್ರೀಯ ನಾಯಕರ ಹೆಸರು ಬಹಿರಂಗಗೊಂಡಿತ್ತು.
ಇದೀಗ ಅದೇ ಮಾದರಿಯಲ್ಲಿ ಪ್ಯಾರಡೈಸ್ ಪೇಪರ್ಸ್ ಲೀಕ್ ಆಗಿದ್ದು, ಬಾಲಿವುಡ್ ಬಿಗ್ ಬಿ ಅಮಿತಾಭ್ ಬಚ್ಚನ್, ಕೇಂದ್ರ ಸಚಿವ ಜಯಂತ್ ಸಿನ್ಹಾ, ಆರ್ ಕೆ ಸಿನ್ಹಾ, ಅಶೋಕ್ ಗೆಹ್ಲೆಟ್, ನೀರಾ ರಾಡಿಯಾ, ಸಂಜಯ್ ದತ್ ಪತ್ನಿ ಮಾನ್ಯತಾ ದತ್, ಕಾಂಗ್ರೆಸ್ ನಾಯಕ ಪಿ. ಚಿದಂಬರಂ ಪುತ್ರ ಕಾರ್ತಿ ಚಿದಂಬರಂ, ವಯಲಾರ್ ರವಿ ಪುತ್ರ ರವಿ ಕೃಷ್ಣಾ, ಹರ್ಷಾ ಮೊಯ್ಲಿ, ಮದ್ಯ ದೊರೆ ವಿಜಯ್ ಮಲ್ಯಾ ಹೆಸರುಗಳು ಪಟ್ಟಿಯಲ್ಲಿ ಇವೆ.
ಈ ಗಣ್ಯರು ತೆರಿಗೆದಾರರ ಸ್ವರ್ಗ ಎನಿಸುವಂತಹ ರಾಷ್ಟ್ರಗಳಲ್ಲಿ ಹೂಡಿಕೆ ಮಾಡಿದ್ದಾರೆ ಎನ್ನಲಾಗಿದೆ. ಒಟ್ಟು 714 ಮಂದಿ ಭಾರತೀಯರ ಹೆಸರೂ ಇದರಲ್ಲಿರುವುದು ಆತಂಕಕಾರಿಯಾಗಿದೆ. ಪ್ಯಾರಡೈಸ್ ಪೇಪರ್ಸ್ ಎಂದರೆ ತನಿಖಾ ವರದಿಗಳ ಸಮಗ್ರ ಮಾಹಿತಿಯನ್ನೊಳಗೊಂಡ 13.4 ದಶಲಕ್ಷ ದಾಖಲೆಗಳ ಸಂಗ್ರಹವಾಗಿದೆ.
ತಾಜಾ ಸುದ್ದಿಗಳನ್ನು ಓದಲು ವೆಬ್‌ದುನಿಯಾ ಮೊಬೈಲ್ ಆ್ಯಪ್ ಡೌನ್‍ ಲೋಡ್ ಮಾಡಿಕೊಳ್ಳಿ