10 ದಿನ ಕುಳಿತಲ್ಲೇ ಕುಳಿತು ಪ್ರೇಮಿಗಾಗಿ ಕಾದ, ಮುಂದೇನಾಯ್ತು?

ಪ್ರೇಮಿಯೊಬ್ಬ ತನ್ನ ಗೆಳತಿಯ ಬರುವಿಕೆಗಾಗಿ ಕಾದು ಕಾದು ಆಸ್ಪತ್ರೆ ಸೇರಿದ ಘಟನೆ ಚೀನಾದಲ್ಲಿ ನಡೆದಿದೆ.

ಘಟನೆ ವಿವರ: ಹಾಲೆಂಡ್ ಮೂಲದ ಪೀಟರ್  ಮತ್ತು ಚೀನಾದ ಮೂಲದ 26 ವರ್ಷದ ಯುವತಿ ಝಾಂಗ್‌ಗೂ ಸಾಮಾಜಿಕ ಜಾಲತಾಣದಲ್ಲಿ 2 ತಿಂಗಳ ಹಿಂದೆ ಪರಿಚಯವಾಗಿತ್ತು. ಪರಿಚಯ ಸ್ನೇಹವಾಗಿ ಬಳಿಕ ಪ್ರೀತಿಯಾಗಿ ಬೆಳೆಯಲು ಹೆಚ್ಚು ಸಮಯ ಹಿಡಿಯಲಿಲ್ಲ. ಆಕೆಯನ್ನು ಗಾಢವಾಗಿ ಪ್ರೀತಿಸ ತೊಡಗಿದ ಪೀಟರ್  ಆಕೆಯನ್ನು ನೋಡಲೆಂದು ಚೀನಾಕ್ಕೆ ವಿಮಾನವನ್ನೇರಿಯೇ ಬಿಟ್ಟ.

ಹುನಾನ್ ಪ್ರಾಂತ್ಯದಲ್ಲಿ ವಿಮಾನವನ್ನಿಳಿದು ಗೆಳತಿಯನ್ನು ನೋಡುವ ತವಕದಲ್ಲಿ ಕುಳಿತ. ಒಂದು ಗಂಟೆಯಾಯಿತು. ದಿನ, ಎರಡು ದಿನ ಕಳೆಯಿತು. ಆಕೆ ಬರಲೇ ಇಲ್ಲ. ಆದರೆ ಹಠ ಬಿಡದ ಆತ ಪ್ರಿಯತಮೆ ಬಂದೇ ಬರುತ್ತಾಳೆಂದು ಕುಳಿತೇ ಇದ್ದ. ಅದಾಗಲೇ 10 ದಿನಗಳು ಉರುಳಿದ್ದವು. ಇದರಿಂದ ಪೀಟರ್ ಆರೋಗ್ಯದಲ್ಲಿ ಏರುಪೇರಾಗಿದ್ದು ವಿಮಾನ ನಿಲ್ದಾಣದ ಸಿಬ್ಬಂದಿ ಆಸ್ಪತ್ರೆಗೆ ದಾಖಲಿಸಿದ್ದಾರೆ.

ಈ ವಿಚಾರ ಮಾಧ್ಯಮಗಳಲ್ಲಿ ಪ್ರಸಾರವಾಗುತ್ತಿದ್ದಂತೆ, ಆಘಾತಗೊಂಡ ಝಾಂಗ್ ಪ್ರತಿಕ್ರಿಯಿಸಿದ್ದು, ಪೀಟರ್ ನನ್ನನ್ನು ನೋಡಲು ಬರುವುದಾಗಿ ಹೇಳಿದ್ದ. ವಿಮಾನದ ಟಿಕೆಟ್ ಫೋಟೋವನ್ನು ಕೂಡ ಕಳುಹಿಸಿದ್ದ. ನಿಜ, ಆದರೆ ನಾನದನ್ನು ತಮಾಷೆ ಎಂದು ಕೊಂಡಿದ್ದೆ.  ಪ್ಲಾಸ್ಟಿಕ್ ಸರ್ಜರಿ ಮಾಡಿಸುವ ಸಲುವಾಗಿ ಬೇರೆ ಪ್ರದೇಶಕ್ಕೆ ಹೋಗಿದ್ದ ನಾನು ಫೋನ್ ಆಫ್ ಮಾಡಿದ್ದೆ. ಹೀಗಾಗಿ ಆತ ಬಂದಿದ್ದು ನನಗೆ ತಿಳಿಯಲಿಲ್ಲ ಎಂದಿದ್ದಾಳೆ. ತನ್ನಿಂದ ಪೀಟರ್‌ಗಾದ ದುಃಸ್ಥಿತಿಗೆ ಆಕೆ ಖೇದ ವ್ಯಕ್ತ ಪಡಿಸಿದ್ದಾಳೆ.

ಆರೋಗ್ಯ ಸುಧಾರಿಸಿದ ಬಳಿಕ ಪೀಟರ್ ಹಾಲೆಂಡ್‌ಗೆ ಮರಳಲಿದ್ದಾನೆ. ಪ್ರಥಮ ಭೇಟಿ ವಿಫಲವಾದರೂ ನಮ್ಮ ಅಂತರ್ಜಾಲ ಸಂಬಂಧವನ್ನು ಮುಂದುವರೆಸುವುದಾಗಿ ಝಾಂಗ್ ಹೇಳಿದ್ದಾಳೆ.

ತಾಜಾ ಸುದ್ದಿಗಳಿಗಾಗಿ ವೆಬ್ ದುನಿಯಾ ಮೊಬೈಲ್ ಆ್ಯಪ್ ಡೌನ್‌ಲೋಡ್ ಮಾಡಿಕೊಳ್ಳಿ.