ಕೆಲವೊಮ್ಮೆ ಸಣ್ಣ ಸಣ್ಣ ಗಾಯಗಳೂ ಸಹ ಬಹಳಷ್ಟು ನೋವನ್ನುಂಟುಮಾಡುತ್ತದೆ. ಬೇಸಿಗೆ ಕಾಲದಲ್ಲಿ ಸಾಮಾನ್ಯವಾಗಿ ಎಲ್ಲಾ ವಯೋಮಾನದವರ ಗೋಳು ಎಂದರೆ ಬಾಯಿಹುಣ್ಣು. ಇದು ಬಾಯಿಯ ಒಳಗಡೆ, ತುಟಿಯ ಒಳಭಾಗದಲ್ಲಿ ಆಗುತ್ತದೆ. ಈ ಹುಣ್ಣು ದೇಹದ ಉಷ್ಣಾಂಶ ಜಾಸ್ತಿಯಾದಾಗ, ಅಸಿಡಿಟಿ, ವಿಟಾಮಿನ್ ಸಿ, ಬಿ, ಕಬ್ಬಿಣಾಂಶ ಮತ್ತು ಇತರ ಪೋಷಕಾಂಶಗಳ ಕೊರತೆಯಿಂದ ಉಂಟಾಗುತ್ತದೆ. ಇದು ಒಂದು ರೀತಿಯ ಕಿರಿಕಿರಿಯೂ ಹೌದು. ಈ ಹುಣ್ಣಿನಿಂದ ಮಾತನಾಡಲೂ ಆಗದೇ ವಿಪರೀತ ನೋವುಂಟು ಮಾಡುತ್ತದೆ. ಇದನ್ನು ಪರಿಹರಿಸಲು ಕೆಲವು ಮನೆ ಔಷಧಿಗಳಿವೆ.
- ಜ್ಯೇಷ್ಠಮದ್ದು (ಇಂಗ್ಲಿಷಿನಲ್ಲಿ ಇದನ್ನು ಲಿಕ್ವೊರೈಸ್ ಎನ್ನುತ್ತಾರೆ) ಇದರ ಹುಡಿಯನ್ನು ನೀರಿನೊಂದಿಗೆ ಅಥವಾ ಜೇನುತುಪ್ಪದೊಂದಿಗೆ ಸೇರಿಸಿ ಸೇವಿಸುವುದರಿಂದ ಬಾಯಿಹುಣ್ಣಿನ ಸಮಸ್ಯೆಗೆ ಮುಕ್ತಿ ದೊರೆಯುತ್ತದೆ.
- ನಿರಂತರವಾಗಿ ನೀರು ಕುಡಿಯುತ್ತಾ ದೇಹದ ಉಷ್ಣತೆಯನ್ನು ನಿಯಂತ್ರಣದಲ್ಲಿಟ್ಟುಕೊಳ್ಳುವುದರಿಂದ ಬಾಯಿಹುಣ್ಣಿನ ಪ್ರಮಾಣ ಕಡಿಮೆಯಾಗುತ್ತದೆ.
- ಒಂದು ಚಮಚ ಗಸೆಗಸೆ ಮತ್ತು ಸ್ವಲ್ಪ ಒಣಕೊಬ್ಬರಿಯನ್ನು ತೆಗೆದುಕೊಂಡು ಬಾಯಿಯಲ್ಲಿ ಜಗಿದು ಅದರ ರಸವನ್ನು ಹೀರುವುದರಿಂದ ಬಾಯಿಹುಣ್ಣು ಒಂದೇ ದಿನದಲ್ಲಿ ಕಡಿಮೆಯಾಗುತ್ತದೆ.
- ಚೆನ್ನಾಗಿ ಕಳೆತ ಬಾಳೆಹಣ್ಣಿಗೆ ಕೊಂಚ ಜೇನು ಸೇರಿಸಿ ಕಿವುಚಿ ಲೇಪನವನ್ನು ತಯಾರಿಸಿ ಆ ಲೇಪನವನ್ನು ದಪ್ಪವಾಗಿ ಹುಣ್ಣು ಇರುವಲ್ಲಿ ಹಚ್ಚುವುದರಿಂದ ಬಾಯಿಹುಣ್ಣು ಶಮನವಾಗುತ್ತದೆ.
- ಕೊತ್ತಂಬರಿ ಸೊಪ್ಪನ್ನು ನೀರಿನಲ್ಲಿ ಕುದಿಸಿ ಅದರ ನೀರನ್ನು ಸೇವಿಸುವುದರಿಂದ ಬಾಯಿಹುಣ್ಣು ಕಡಿಮೆಯಾಗುತ್ತದೆ.
- ಕೊತ್ತಂಬರಿ ಕಾಳನ್ನು ನೆನೆ ಹಾಕಿದ ನೀರಿನಲ್ಲಿ ಬಾಯಿ ಮುಕ್ಕಳಿಸುವುದರಿಂದಲೂ ಬಾಯಿಹುಣ್ಣು ಕಡಿಮೆಯಾಗುತ್ತದೆ.
- ಮೊಸರು, ಮಜ್ಜಿಗೆ, ಹಣ್ಣಿನ ಜ್ಯೂಸ್‌ಗಳು, ತಂಪಾದ ಪಾನೀಯಗಳನ್ನು ಸೇವಿಸುವುದರಿಂದಲೂ ಬಾಯಿಹುಣ್ಣು ಕಡಿಮೆಯಾಗುತ್ತದೆ.
- ಬಾಯಿಹುಣ್ಣಾದಾಗ ಆದಷ್ಟು ಬಿಸಿ ಪದಾರ್ಥಗಳು, ಮಸಾಲೆ ಪದಾರ್ಥಗಳು ಮತ್ತು ಉಪ್ಪಿನಂಶದ ಪದಾರ್ಥಗಳ ಸೇವನೆಯನ್ನು ಕಡಿಮೆ ಮಾಡಿದರೆ ಬಾಯಿಹಣ್ಣು ಕಡಿಮೆಯಾಗುತ್ತದೆ.
- ಜೇನುತುಪ್ಪವನ್ನು ಹುಣ್ಣಿನ ಮೇಲೆ ಹಚ್ಚುವುದರಿಂದ ಅಥವಾ ಸ್ವಲ್ಪ ನೆಲ್ಲಿಕಾಯಿಯ ಪುಡಿಯನ್ನು ಜೇನುತುಪ್ಪದೊಂದಿಗೆ ಮಿಶ್ರಣ ಮಾಡಿ ಹುಣ್ಣಾದ ಜಾಗಕ್ಕೆ ಸವರುವುದರಿಂದಲೂ ಸಹ ಬಾಯಿಹುಣ್ಣು ಕಡಿಮೆಯಾಗುತ್ತದೆ.
- 5 ರಿಂದ 6 ತುಳಸಿ ಎಲೆಗಳನ್ನು ಬಾಯಿಯಲ್ಲಿ ರಸ ಬರುವವರೆಗೆ ಅಗಿದು ಅದರ ರಸದ ಜೊತೆಗೆ ನೀರನ್ನು ಸೇವಿಸುವುದರಿಂದ ಬಾಯಿಹುಣ್ಣು ಕಡಿಮೆಯಾಗುತ್ತದೆ.
- ಮೆಂತೆಕಾಳನ್ನು ರಾತ್ರಿ ಮಲಗುವ ಮುನ್ನ ಬಾಯಿಯಲ್ಲಿ ಹಾಕಿ ಜಗಿದು ನುಂಗುವುದರಿಂದಲೂ ಬಾಯಿಹುಣ್ಣು ಶಮನವಾಗುತ್ತದೆ.
- ಬಾಯಿಹುಣ್ಣಾದ ಸಂದರ್ಭದಲ್ಲಿ ಟೀ ಅಥವಾ ಕಾಫಿಯ ಸೇವನೆಯನ್ನು ವರ್ಜಿಸುವುದರಿಂದ ಬಾಯಿಹುಣ್ಣು ಕಡಿಮೆಯಾಗುತ್ತದೆ.
- ಅಲೋವೆರಾವು ಉರಿಯನ್ನು ಕಡಿಮೆ ಮಾಡುವ ನೈಸರ್ಗಿಕ ಗುಣವನ್ನು ಹೊಂದಿದೆ. ಇದು ಆಮ್ಲೀಯದ ಶೇಖರಮೆಯನ್ನು ತಡೆಗಟ್ಟಿ ದೇಹವನ್ನು ತಂಪಾಗಿಡುತ್ತದೆ. ಇದರಿಂದ ಬಾಯಿಹುಣ್ಣು ಶಮನವಾಗುತ್ತದೆ.
- ಕುಚ್ಚಿಲು ಅಕ್ಕಿಯನ್ನು ತೊಳೆದ ನೀರಿನಲ್ಲಿ ಬಾಯಿಯನ್ನು ಮುಕ್ಕಳಿಸುವುದರಿಂದಲೂ ಬಾಯಿಹುಣ್ಣು ಕಡಿಮೆಯಾಗುತ್ತದೆ.
- ಸಾಕಷ್ಟು ಔಷಧೀಯ ಗುಣಗಳನ್ನು ಹೊಂದಿರುವ ಅರಿಶಿನಪುಡಿಯನ್ನು ಹುಣ್ಣಾದ ಜಾಗಕ್ಕೆ ಪೇಸ್ಟ್ ಮಾಡಿ ಹಚ್ಚುವುದರಿಂದ ಬಾಯಿಹುಣ್ಣು ಶಮನವಾಗುತ್ತದೆ. ಜೊತೆಗೆ ಅರಿಶಿನವು ಬಾಯಿಹುಣ್ಣು ಬರದಂತೆ ತಡೆಯುತ್ತದೆ.
- ಕಲ್ಲುಸಕ್ಕರೆಪುಡಿಯನ್ನು ಕರ್ಪೂರದ ಪುಡಿಯೊಂದಿಗೆ ಮಿಶ್ರಣ ಮಾಡಿ ಹಚ್ಚುವುದರಿಂದ ಬಾಯಿಹುಣ್ಣು ಮತ್ತು ಅವುಗಳಿಂದಾಗುವ ಉರಿ ಹಾಗೂ ಬಾತುಕೊಳ್ಳುವುದನ್ನು ಕಡಿಮೆಯಾಗುತ್ತದೆ.
- ಸೀಬೆಕಾಯಿಯ ಚಿಗುರು ಎಲೆಯನ್ನು ಬಾಯಿಯಲ್ಲಿ ಹಾಕಿ ರಸವನ್ನು ನುಂಗುವುದರಿಂದಲೂ ಸಹ ಬಾಯಿಹುಣ್ಣು ಕಡಿಮೆಯಾಗುತ್ತದೆ.
- ತೆಂಗಿನಎಣ್ಣೆಯಲ್ಲಿಯೂ ಸಹ ನೈಸರ್ಗಿಕವಾಗಿ ಉರಿಯನ್ನು ಕಡಿಮೆ ಮಾಡುವ ಗುಣವಿದೆ. ಮಲಗುವ ಮುನ್ನ ಹುಣ್ಣಿನ ಮೇಲೆ ತೆಂಗಿನ ಎಣ್ಣೆಯನ್ನು ಹಚ್ಚುವುದರಿಂದ ಬಾಯಿಹುಣ್ಣು ಕಡಿಮೆಯಾಗುತ್ತದೆ.
- ಅದೇ ರೀತಿ ಹುಣ್ಣಿನ ಮೇಲೆ ತುಪ್ಪವನ್ನು ಹಚ್ಚುವುದರಿಂದಲೂ ಬಾಯಿಹುಣ್ಣು ಕಡಿಮೆಯಾಗುತ್ತದೆ.
