ಲಂಡನ್: ಇತ್ತೀಚೆಗಿನ ದಿನಗಳಲ್ಲಿ ಮಾಧ್ಯಮಗಳಲ್ಲಿ ಪ್ರಸಾರವಾಗುತ್ತಿರುವ ಟೀಂ ಇಂಡಿಯಾ ಕೋಚ್ ಅನಿಲ್ ಕುಂಬ್ಳೆ ಮತ್ತು ನಾಯಕನ ನಡುವಿನ ಭಿನ್ನಾಭಿಪ್ರಾಯದ ಬಗ್ಗೆ ಸ್ವತಃ ವಿರಾಟ್ ಕೊಹ್ಲಿ ಸ್ಪಷ್ಟನೆ ನೀಡಿದ್ದಾರೆ.
ಪಾಕಿಸ್ತಾನದ ಜತೆಗಿನ ಪಂದ್ಯಕ್ಕೆ ಮುನ್ನ ಪತ್ರಿಕಾಗೋಷ್ಠಯಲ್ಲಿ ಮಾತನಾಡುವಾಗ ಪತ್ರಕರ್ತರ ಪ್ರಶ್ನೆಗೆ ಉತ್ತರಿಸಿದ ಕೊಹ್ಲಿ ಮಾಧ್ಯಮಗಳಲ್ಲಿ ಪ್ರಸಾರವಾಗುತ್ತಿರುವಂತೆ ತಮ್ಮ ನಡುವೆ ಅಂತಹ ವೈಮನಸ್ಯವೇನೂ ಇಲ್ಲ. ನಾವು ಚೆನ್ನಾಗಿಯೇ ಇದ್ದೇವೆ ಎಂದಿದ್ದಾರೆ.
‘ಒಂದು ಮನೆಯೆಂದ ಮೇಲೆ ಅಲ್ಲಿ ಎಲ್ಲರ ಅಭಿಪ್ರಾಯಗಳು ಒಂದೇ ರೀತಿ ಇರಲು ಸಾಧ್ಯವಿಲ್ಲ. ಅದೇ ರೀತಿ ಒಂದು ತಂಡವೆಂದ ಮೇಲೆ ಎಲ್ಲಾ ಸಂದರ್ಭದಲ್ಲೂ ಎಲ್ಲರದ್ದೂ ಒಂದೇ ರೀತಿಯ ಅಭಿಪ್ರಾಯವಿರಬೇಕೆಂದಿಲ್ಲ. ಹಾಗಿರುವಾಗ ಅಂತಹ ಅಭಿಪ್ರಾಯ ಬೇಧಗಳೇ ದೊಡ್ಡ ವಿಷಯವಲ್ಲ. ಇದೆಲ್ಲಾ ಮಾಧ್ಯಮಗಳ ಸೃಷ್ಟಿ.
ಈಗ ನಾನೇ ಸ್ಪಷ್ಟನೆ ನೀಡುತ್ತಿದ್ದೇನೆ. ಈಗಲೂ ಇದು ನಿಮ್ಮ ತಪ್ಪು ಕಲ್ಪನೆಯಾಗಿತ್ತು ಎಂದು ಒಪ್ಪಿಕೊಳ್ಳಲು ಸಿದ್ಧರಿರುವುದಿಲ್ಲ. ನನ್ನ ಸ್ಪಷ್ಟನೆ ಎಂದಷ್ಟೇ ಪರಿಗಣಿಸುತ್ತೀರಿ. ಅಸಲಿಗೆ ಕುಂಬ್ಳೆ ಜತೆಗಿನ ಒಂದು ವರ್ಷದ ಪಯಣ ಅದ್ಭುತವಾಗಿಯೇ ಇತ್ತು. ಅಂತಹ ಸಮಸ್ಯೆಗಳೇನೂ ನಮ್ಮ ನಡುವೆ ಇಲ್ಲ’ ಎಂದು ಕೊಹ್ಲಿ ಸ್ಪಷ್ಟನೆ ನೀಡಿದ್ದಾರೆ.
ಅಷ್ಟಕ್ಕೂ ಇಂತಹ ವಿವಾದಗಳ ಬಗ್ಗೆ ಅವರು ತಲೆಕೆಡಿಸಿಲ್ಲವಂತೆ. ಸದ್ಯಕ್ಕೆ ನಮ್ಮ ಗಮನ ಚಾಂಪಿಯನ್ಸ್ ಟ್ರೋಫಿಯತ್ತ ಮಾತ್ರ ಎಂದು ಸ್ಪಷ್ಟಪಡಿಸಿದ್ದಾರೆ.
