ಲಂಡನ್: ಭಾರತ ಮತ್ತು ಪಾಕಿಸ್ತಾನ ನಡುವೆ ಪಂದ್ಯವೆಂದರೆ ಎಲ್ಲರಿಗೂ ನೆನಪಾಗುವುದು ಸಚಿನ್ ತೆಂಡುಲ್ಕರ್. ಅವರಷ್ಟು ಪಾಕಿಸ್ತಾನವನ್ನು ಬೆಂಡೆತ್ತಿದ ಆಟಗಾರ ಬೇರೆ ಯಾರೂ ಇಲ್ಲ. ಅಂತಿಪ್ಪ ಸಚಿನ್ ನಾಳೆ ಭಾರತ-ಪಾಕ್ ಪಂದ್ಯಕ್ಕೆ ಹಾಜರಿರಲಿದ್ದಾರೆ.
ಹೌದು. ಚಾಂಪಿಯನ್ಸ್ ಟ್ರೋಫಿ ಕ್ರಿಕೆಟ್ ನಲ್ಲಿ ನಾಳೆ ನಡೆಯಲಿರುವ ಭಾರತ ಪಾಕ್ ಹೈ ವೋಲ್ಟೇಜ್ ಪಂದ್ಯಕ್ಕೆ ಸಚಿನ್ ಇದುವರೆಗೆ ಮಾಡದ ಕೆಲಸ ಮಾಡಲಿದ್ದಾರೆ. ಅಂದರೆ ಕಾಮೆಂಟರಿ ಬಾಕ್ಸ್ ನಲ್ಲಿ ಕುಳಿತು ಕಾಮೆಂಟರಿ ಹೇಳಲಿದ್ದಾರಂತೆ!
ಅದೂ ಸ್ಟಾರ್ ಸ್ಪೋರ್ಟ್ ಚಾನೆಲ್ ನಲ್ಲಿ. ಸಚಿನ್ ಸಹ ಆಟಗಾರರಾಗಿದ್ದ ಸೌರವ್ ಗಂಗೂಲಿ, ಅನಿಲ್ ಕುಂಬ್ಳೆ, ವಿವಿಎಸ್ ಲಕ್ಷ್ಮಣ್ ಹಾಗೂ ವೀರೇಂದ್ರ ಸೆಹ್ವಾಗ್ ಎಲ್ಲರೂ ನಿವೃತ್ತರಾದ ಮೇಲೆ ಕಾಮೆಂಟರಿ ಹೇಳಿದವರೇ. ಆದರೆ ಸಚಿನ್ ಇದೇ ಮೊದಲ ಬಾರಿಗೆ ಆ ಕೆಲಸ ಮಾಡುತ್ತಿದ್ದಾರೆ. ಅದೂ ಪಾಕ್ ಪಂದ್ಯವೆನ್ನುವಾಗ ಸಚಿನ್ ಸ್ವಲ್ಪ ಹೆಚ್ಚೇ ಉತ್ಸುಕರಾಗಿದ್ದಾರೆ!
