ಲಂಡನ್: ಟೀಂ ಇಂಡಿಯಾ ದ.ಆಫ್ರಿಕಾ ತಂಡವನ್ನು ಸೋಲಿಸಿ ಚಾಂಪಿಯನ್ಸ್ ಟ್ರೋಫಿ ಸೆಮಿಫೈನಲ್ ಗೇರಿದ ಮೇಲೆ ತಂಡದ ಬಗ್ಗೆ ಟ್ವಿಟರ್ ನಲ್ಲಿ ಕುತೂಹಲಕಾರಿ ತಮಾಷೆಯೊಂದು ಹರಿದಾಡುತ್ತಿದೆ.
ಮೊದಲ ಪಂದ್ಯದಲ್ಲಿ ಟೀಂ ಇಂಡಿಯಾ ಪಾಕ್ ವಿರುದ್ಧ ಭರ್ಜರಿಯಾಗಿ ಗೆದ್ದಿತ್ತು. ದ್ವಿತೀಯ ಪಂದ್ಯದಲ್ಲಿ ಲಂಕಾ ವಿರುದ್ಧ ಸೋತಿತ್ತು. ನಿನ್ನೆ ಮತ್ತೆ ದ. ಆಫ್ರಿಕಾ ವಿರುದ್ಧ ಗೆದ್ದಿದೆ. ಇವರಲ್ಲಿ ಪಾಕ್ ಮತ್ತು ಆಫ್ರಿಕಾ ಆಟಗಾರರು ಹಸಿರು ಬಣ್ಣದ ಸಮವಸ್ತ್ರಧಾರಿಗಳು.
ಹಾಗಾಗಿ ಭಾರತ ತಂಡಕ್ಕೆ ಹಸಿರು ಸಮವಸ್ತ್ರಧಾರಿಗಳನ್ನು ನೋಡಿದರೆ ಆಡಲು ಎಲ್ಲಿಲ್ಲದ ಉತ್ಸಾಹ ಬರುತ್ತದೆ. ಲಂಕಾ ನೇರಳೆ ಬಣ್ಣದ ಸಮವಸ್ತ್ರ ಧರಿವುದರಿಂದ ಅವರ ವಿರುದ್ಧ ಸೋತಿತು. ಆದರೆ ಹಸಿರು ಬಣ್ಣದ ಅಂಗಿ ತೊಟ್ಟವರೆಂದರೆ ಅದು ಪಾಕಿಸ್ತಾನ ತಂಡವೆಂದುಕೊಂಡು ಟೀಂ ಇಂಡಿಯಾ ಎಲ್ಲಿಲ್ಲದ ಉತ್ಸಾಹದಲ್ಲಿ ಆಡುತ್ತದೆ ಎಂದು ಟ್ವಿಟರಿಗರು ತಮಾಷೆ ಮಾಡುತ್ತಿದ್ದಾರೆ.
ಇದೀಗ ಸೆಮಿಫೈನಲ್ ನಲ್ಲಿ ಭಾರತಕ್ಕೆ ಬಾಂಗ್ಲಾದೇಶ ಎದುರಾಳಿ. ಬಾಂಗ್ಲಾ ಆಟಗಾರರೂ ಹಸಿರು ಸಮವಸ್ತ್ರ ಧರಿಸುವುದರಿಂದ ಮುಂದಿನ ಸರದಿ ಬಾಂಗ್ಲಾದ್ದು ಎಂದು ಟ್ವಿಟರ್ ನಲ್ಲಿ ಸಂದೇಶಗಳು ಹರಿದಾಡುತ್ತಿವೆ. ಇಂತಹದ್ದೊಂದು ಲಾಜಿಕ್ ಹುಟ್ಟು ಹಾಕಿರುವುದು ಮಾಜಿ ಕ್ರಿಕೆಟಿಗ ವೀರೇಂದ್ರ ಸೆಹ್ವಾಗ್ ಎನ್ನುವುದು ವಿಶೇಷ!
