ಬಾರ್ಬಡೋಸ್: ಟಿ20 ವಿಶ್ವಕಪ್ 2024 ರ ಫೈನಲ್ ಪಂದ್ಯವನ್ನು 7 ರನ್ ಗಳಿಂದ ಗೆದ್ದ ಬಳಿಕ ಟೀಂ ಇಂಡಿಯಾದ ಪ್ರತಿಯೊಬ್ಬ ಆಟಗಾರರ ಕಣ್ಣಲ್ಲಿ ನೀರು. ಗೆಲುವಿನ ಬೆನ್ನಲ್ಲೇ ವರುಣ ಕೂಡಾ ಪನ್ನೀರು ಸುರಿದಿದ್ದು ವಿಶೇಷವಾಗಿತ್ತು.
19.5 ಓವರ್ ನಲ್ಲಿ ಭಾರತದ ಗೆಲುವು ಖಚಿತವಾಗುತ್ತಿದ್ದಂತೇ ನಾಯಕ ರೋಹಿತ್ ಶರ್ಮಾ ಸಂಭ್ರಮಿಸಲು ಆರಂಭಿಸಿದ್ದರೆ ವಿರಾಟ್ ಕೊಹ್ಲಿ ಕೂಡಾ ಕಣ್ಣೀರು ಹಾಕಲು ಆರಂಭಿಸಿದ್ದರು. ಇನ್ನು, ಹಾರ್ದಿಕ್ ಪಾಂಡ್ಯ ಕೊನೆಯ ಎಸೆತವನ್ನು ಕಣ್ಣೀರು ಹಾಕುತ್ತಲೇ ಎಸೆದರು.
ಇದುವರೆಗೆ ಅಳದ ಜಸ್ಪ್ರೀತ್ ಬುಮ್ರಾ ಕೂಡಾ ಇಂದು ಕಣ್ಣೀರು ಸುರಿಸಿದರು. ರಿಷಬ್ ಪಂತ್ ಕೂಡಾ ಇದಕ್ಕೆ ಹೊರತಾಗಿರಲಿಲ್ಲ. ವಿಶೇಷವೆಂದರೆ ಏಕದಿನ ವಿಶ್ವಕಪ್ ಫೈನಲ್ ಸೋಲಿನ ಬಳಿಕ ನಿರಾಸೆಯಲ್ಲಿ ಕಣ್ಣೀರು ಹಾಕಿದ್ದ ಮೊಹಮ್ಮದ್ ಸಿರಾಜ್ ಇಂದು ಮೈದಾನಕ್ಕೆ ಓಡಿ ಬಂದು ಖುಷಿಯಲ್ಲಿ ಕಣ್ಣೀರು ಹಾಕಿದರು.
ವಿಶೇಷವೆಂದರೆ ಭಾರತ ಗೆಲುವಿನ ಬೆನ್ನಲ್ಲೇ ಅಷ್ಟು ಹೊತ್ತು ತಡೆದಿದ್ದ ವರುಣ ಕೂಡಾ ಧರೆಗುಳಿದು ಬಂದಿದ್ದ. ಗೆಲುವಿನ ಜೊತೆಗೆ ಮಳೆಯೂ ಬಂದಿದ್ದು ಭಾರತಕ್ಕೆ ಶುಭ ಶಕುನವಾಗಿತ್ತು. ಕೊನೆಗೂ ಆಟಗಾರನಾಗಿ ಸಿಗದ ಐಸಿಸಿ ಟ್ರೋಫಿ ರಾಹುಲ್ ದ್ರಾವಿಡ್ ಗೆ ಕೋಚ್ ಆಗಿ ಸಿಕ್ಕಿದ್ದು ವಿಶೇಷವಾಗಿತ್ತು.
