RCB: ಆರ್ ಸಿಬಿ ತಂಡ ಮಾರಾಟಕ್ಕಿದೆ: ಕೊಳ್ಳಲು ದೊಡ್ಡ ಕುಳವೇ ಆಗಿರ್ಬೇಕು ಬಿಡಿ

ಬೆಂಗಳೂರು: ಐಪಿಎಲ್ ನ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಮಾರಾಟಕ್ಕಿದೆ. ಕೊಳ್ಳಬೇಕೆಂದರೆ ದೊಡ್ಡ ಕುಳವೇ ಆಗಿರಬೇಕು. ಯಾಕೆ ಅಂತೀರಾ? ಇಲ್ಲಿದೆ ನೋಡಿ ವಿವರ.

ಆರ್ ಸಿಬಿ ಈ ಬಾರಿ ಐಪಿಎಲ್ ಗೆದ್ದು ಖುಷಿಯಲ್ಲಿತ್ತು. ಇದರ ನಡುವೆಯೇ ಚಿನ್ನಸ್ವಾಮಿ ಮೈದಾನದ ಬಳಿ ಕಾಲ್ತುಳಿತವಾಗಿ 11 ಜನರ ಸಾವಾಗಿತ್ತು. ಪ್ರಕರಣದಲ್ಲಿ ಈಗ ಆರ್ ಸಿಬಿಗೆ ಸಂಬಂಧಪಟ್ಟ ಕೆಲವರೂ ಅರೆಸ್ಟ್ ಆಗಿದ್ದಾರೆ. ಇದರ ನಡುವೆ ತಂಡ ಮುಂದಿನ ಸೀಸನ್ ಗೆ ಬ್ಯಾನ್ ಆಗಬಹುದು ಎಂಬ ಸುದ್ದಿ ಕೇಳಿಬರುತ್ತಿದೆ.

ಅದರ ನಡುವೆ ಆರ್ ಸಿಬಿ ತಂಡ ಬಿಕರಿಯಾಗಲಿರುವ ಸುದ್ದಿ ಕೇಳಿಬರುತ್ತಿದೆ. ಬ್ರಿಟನ್ ಮೂಲದ ಡಿಯಾಜಿಯೊ ಕಂಪನಿ ಆರ್ ಸಿಬಿ ಮಾಲಿಕತ್ವದ ದೊಡ್ಡ ಷೇರು ಹೊಂದಿದೆ. ಇದೀಗ ಡಿಯಾಜಿಯೊ ಕಂಪನಿ ತನ್ನ ಷೇರು ಮಾರಾಟಕ್ಕೆ ಮುಂದಾಗಿದೆ ಎಂದು ವರದಿಯಾಗುತ್ತಿದೆ.

ಸುಮಾರು 17,000 ಕೋಟಿ ರೂ.ಗೆ ಡೀಲ್ ಕುದುರಿಸುವುದಾದರೆ ಮಾರಾಟ ಮಾಡಲು ಡಿಯಾಜಿಯೊ ಸಂಸ್ಥೆ ತಯಾರಾಗಿದೆ ಎಂಬ ಸುದ್ದಿ ಬರುತ್ತಿದೆ. ಈಗ ಇದನ್ನು ಕೊಳ್ಳಲು ಭಾರತೀಯ ಕಂಪನಿಯೇ ಮುಂದೆ ಬರುತ್ತಾ, ಯಾರು ಖರೀದಿಸಬಹುದು ಎಂಬ ಕುತೂಹಲವಂತೂ ಅಭಿಮಾನಿಗಳಲ್ಲಿದೆ.