ಘೋರ: ಗಂಡು ಬೇಕೆಂಬ ವ್ಯಾಮೋಹ ಇದನ್ನೆಲ್ಲ ಮಾಡಿಸತ್ತಾ?

ಕಾಲ ಎಷ್ಟು ಮುಂದುವರೆದರೂ ನಮ್ಮ ದೇಶದಲ್ಲಿ ಲಿಂಗ ತಾರತಮ್ಯ, ಗಂಡು ಮಕ್ಕಳ ಮೇಲಿನ ವ್ಯಾಮೋಹ ಇನ್ನೂ ಹಾಗೆಯೆ ಇದೆ ಎಂಬುದಕ್ಕೆ ಸ್ಪಷ್ಟ ನಿದರ್ಶನ ಈ ಹೇಯ ಘಟನೆ. ಮೊಮ್ಮಗನ ನಿರೀಕ್ಷೆಯಲ್ಲಿದ್ದ ಪೈಶಾಚಿಕ ಮನಸ್ಥಿತಿಯ ಅಜ್ಜಿಯೋರ್ವಳು ಹುಟ್ಟಿದ್ದು ಹೆಣ್ಣೆಂಬ ನಿರಾಶೆಯಲ್ಲಿ ಎರಡು ತಿಂಗಳ ಶಿಶುವನ್ನು ಹತ್ಯೆಗೈದ ಅಮಾನುಷ ಘಟನೆ ಹರಿಯಾಣಾದ ಬಹದುರ್ಗಾ ನಗರದಲ್ಲಿ ನಡೆದಿದೆ. 

ಮಗುವಿನ ಉಸಿರುಗಟ್ಟಿಸಿ ಹತ್ಯೆಗೈದು ನೆಲದ ಮೇಲೆ ಎಸೆದು ಕೊಂದಿದ್ದಾಳೆ ಎಂದು ಪ್ರಾಥಮಿಕ ತನಿಖೆಯಿಂದ ತಿಳಿದು ಬಂದಿದೆ. 

ಪಾಪಿ ಅಜ್ಜಿ ಸುದೇಶ್ ಹೆಣ್ಣು ಮಗುವನ್ನು ಹೆತ್ತ ಕಾರಣಕ್ಕೆ ಸದಾ ಸೊಸೆಗೆ ಕಿರುಕುಳ ನೀಡುತ್ತಿದ್ದಳು. ನೀನು ನಮ್ಮ ಮನೆಗೆ ಬರುವುದು ಬೇಡ. ತವರಿನಲ್ಲಿಯೇ ಇರು ಎಂದು ಖಡಕ್ ಆಗಿ ಆದೇಶಿಸಿದ್ದಳು ಎಂದು ತಿಳಿದು ಬಂದಿದೆ.

ಆದರೆ ಸೋಮವಾರ ಆಕೆ ಗಂಡನ ಮನೆಗೆ ಮರಳಿದ್ದಾಳೆ. ಮೊದಲೇ ಆ ಮಗುವಿನ ಮೇಲೆ ದ್ವೇಷ ಕಾರುತ್ತಿದ್ದ ಸುದೇಶ್ ಮಗುವನ್ನು ಕಿತ್ತುಕೊಂಡು ಉಸಿರುಗಟ್ಟಿಸಿದ್ದಾಳೆ. ಬಳಿಕ ನೆಲಕ್ಕೆ ಕುಟ್ಟಿ ಸಾಯಿಸಿದ್ದಾಳೆ. ತಕ್ಷಣ ಮಗುವನ್ನೆತ್ತಿಕೊಂಡ ತಾಯಿ ಆಸ್ಪತ್ರೆಗೆ ಓಡಿದಳಾದರೂ ಅದಾಗಲೇ ಮಗು ಸಾವನ್ನಪ್ಪಿತ್ತು ಎಂದು ಪೊಲೀಸರು ತಿಳಿಸಿದ್ದಾರೆ. 

ಸೊಸೆ ಮನೆಗೆ ಮರಳುತ್ತಿದ್ದಂತೆ ಶವವನ್ನು ಕಿತ್ತುಕೊಂಡ ಅತ್ತೆ - ಮಾವ ಮತ್ತು ಮಗುವಿನ ತಂದೆ ಧಾವಂತದಲ್ಲಿ ಸಮಾಧಿ ಮಾಡಿದ್ದಾರೆ. 

ಮಗುವನ್ನು ಕಳೆದುಕೊಂಡ ತಾಯಿ ತಕ್ಷಣ ತನ್ನ ತಂದೆಗೆ ದೂರವಾಣಿ ಕರೆ ಮಾಡಿ ನಡೆದ ವಿಷಯವನ್ನು ತಿಳಿಸಿದ್ದಾಳೆ. 

ಮಾಹಿತಿ ಪಡೆದ ಪೊಲೀಸರು ದುಷ್ಟ ಸುದೇಶ್ ಕುಟುಂಬವ ವಿರುದ್ಧ ದೂರು ದಾಖಲಿಸಿದ್ದು ಮಗುವಿನ ಶವವನ್ನು ಮೇಲೆತ್ತಿ ಮರಣೋತ್ತರ ಪರೀಕ್ಷೆಗೆ ಕಳುಹಿಸಿದ್ದಾರೆ. 

ತಾಜಾ ಸುದ್ದಿಗಳನ್ನು ಓದಲು ವೆಬ್‌ದುನಿಯಾ ಮೊಬೈಲ್ ಆ್ಯಪ್ ಡೌನ್‍ಲೋಡ್ ಮಾಡಿಕೊಳ್ಳಿ.