ನವದೆಹಲಿ: ವಿದೇಶಕ್ಕೆ ರವಾನೆಯಾಗುವ ಅಕ್ರಮ ವಸ್ತುಗಳನ್ನು ಪತ್ತೆ ಮಾಡಿ ವಶಕ್ಕೆ ತೆಗೆದುಕೊಳ್ಳುವ ಕಸ್ಟಮ್ಸ್ ಅಧಿಕಾರಿಗಳಿಗೆ ಚಿತ್ರ ವಿಚಿತ್ರ ವಸ್ತುಗಳು ಸಿಗುತ್ತಿವೆಯಂತೆ.
ದ್ರೋಣ್ ಕ್ಯಾಮರಾದಿಂದ ಹಿಡಿದು ಸೆಕ್ಸ್ ಟಾಯ್ಸ್ ವರೆಗೆ ಭಾರತದಿಂದ ವಿದೇಶಕ್ಕೆ ರವಾನೆಯಾಗುವ ಸಂದರ್ಭದಲ್ಲಿ ವಿಮಾನ ನಿಲ್ದಾಣಗಳಲ್ಲಿ ಕಸ್ಟಮ್ಸ್ ಅಧಿಕಾರಿಗಳ ಕೈಗೆ ಸಿಕ್ಕಿಬೀಳುತ್ತಿದೆಯಂತೆ. ಇಂತಹ ನಿರ್ಬಂಧಿತ ಸುಮಾರು 1000 ಪಾರ್ಸಲ್ ಗಳನ್ನು ಅಧಿಕಾರಿಗಳು ಇದೀಗ ತಡೆಹಿಡಿದಿದ್ದಾರೆ.
‘ನಿರ್ಬಂಧವಿದ್ದರೂ, ಜನ ಸೆಕ್ಸ್ ಟಾಯ್ ಗಳು, ಪೋರ್ನ್ ಸಿಡಿಗಳು, ನಾರ್ಕೋಟಿಕ್ಸ್ ನಂತಹ ವಸ್ತುಗಳನ್ನು ಆಮದು ಮಾಡಿಕೊಳ್ಳಲು ಮತ್ತು ರಫ್ತು ಮಾಡಲು ಪ್ರಯತ್ನಿಸುತ್ತಾರೆ’ ಎಂದು ಕಸ್ಟಮ್ಸ್ ಅಧಿಕಾರಿಗಳು ಹೇಳಿದ್ದಾರೆ. ಆದರೆ ಇಂತಹ ವಸ್ತುಗಳನ್ನು ತಡೆಹಿಡಿಯುವ ಕೆಲಸವೇ ಅಧಿಕಾರಿಗಳಿಗೆ ತಲೆನೋವಾಗಿ ಕಾಡುತ್ತಿದೆಯಂತೆ.
ವಿದೇಶಕ್ಕೆ ಪಾರ್ಸಲ್ ಕಳುಹಿಸುವ ವಿಭಾಗದಲ್ಲಿ ಅಧಿಕಾರಿಗಳ ಕೊರತೆಯಿದೆ. ಆದರೆ ಇಲ್ಲಿನ ಕೆಲಸವೆಲ್ಲಾ ಮಾನವ ಚಾಲಿತವಾಗಿ ನಡೆಯಬೇಕು. ಹೀಗಾಗಿ ಇಂತಹ ವಸ್ತುಗಳನ್ನು ಪರಿಶೀಲಿಸಿ ತಡೆಹಿಡಿಯುವುದೇ ದೊಡ್ಡ ಕೆಲಸವಾಗಿದೆ ಎಂದು ಅಧಿಕಾರಿಗಳು ಅಳಲು ತೋಡಿಕೊಂಡಿದ್ದಾರೆ.