ತನ್ನ ಸ್ನೇಹಿತ ನೀಡಿದ 5,000 ರೂಪಾಯಿಯನ್ನು ಹಿಂತಿರುಗಿಸಲು ವಿಫಲನಾದ ಹೇಡಿ ಪತಿಯೊಬ್ಬ ತನ್ನ ಪತ್ನಿಯನ್ನು ಅತ್ಯಾಚಾರವೆಸಗಲು ಅವಕಾಶ ನೀಡಿದ ಹೇಯ ಘಟನೆ ಉತ್ತರ ಪ್ರದೇಶದಲ್ಲಿ ನಡೆದಿದೆ.
ಸೆಪ್ಟೆಂಬರ್ 29 ರಂದು ಗಾಜಿಯಾಬಾದ್‌ನಲ್ಲಿ ಈ ಘಟನೆ ನಡೆದಿದ್ದು 26 ವರ್ಷದ ಮಹಿಳೆ, ಆಕೆಯ ನಿವಾಸದಲ್ಲಿಯೇ ಪತಿಯ ಗೆಳೆಯನಿಂದ ಅತ್ಯಾಚಾರಕ್ಕೆ ಒಳಗಾಗಿದ್ದಾಳೆ.
ಬುಲಂದಶಹರ್ ಮೂಲದ ಪೀಡಿತೆ ಮತ್ತು ಆಕೆಯ ಪತಿ ನರೇಶ್ (30) ತಮ್ಮಿಬ್ಬರು ಪುಟ್ಟ ಮಕ್ಕಳೊಂದಿಗೆ ಲೋನಿಯಲ್ಲಿ ವಾಸವಾಗಿದ್ದಾರೆ. ಆರೋಪಿ ಟಿಂಕು ದೆಹಲಿಯಲ್ಲಿನ ಬಟ್ಟೆ ಅಂಗಡಿಯೊಂದರಲ್ಲಿ ಕೆಲಸ ಮಾಡುತ್ತಾನೆ.
ಸೆಪ್ಟೆಂಬರ್ 29 ರಂದು ಪೀಡಿತೆಯ ಪತಿ ನರೇಶ್ ತನ್ನ ಗೆಳೆಯ ಟಿಂಕು ವರ್ಮಾ ಜತೆ ಮನೆಗೆ ಬಂದ. ಅವರಿಬ್ಬರು ಕಂಠಪೂರ್ತಿ ಮದ್ಯ ಸೇವಿಸಿದರು. ಬಳಿಕ ತನ್ನ ಗೆಳೆಯನ ಅನುಮತಿಯ ಮೇರೆಗೆ ಟಿಂಕು ನರೇಶ್ ಪತ್ನಿಯ ಮೇಲೆ ಅತ್ಯಾಚಾರವೆಸಗಿದ.
ಪತಿಯ ಈ ದ್ರೋಹದಿಂದ ನೊಂದ ಪತ್ನಿ ಈಗ ಪೊಲೀಸ್ ಠಾಣೆ ಮೆಟ್ಟಿಲೇರಿದ್ದಾಳೆ.
ಸಾಲವನ್ನು ತೀರಿಸಲಾಗದೇ ನನ್ನ ಪತಿ ಗೆಳೆಯನಿಗೆ ನನ್ನ ಮೇಲೆ ಅತ್ಯಾಚಾರವೆಸಗಲು ಅವಕಾಶ ಮಾಡಿಕೊಟ್ಟ. ಆತ ಅಲ್ಲಿಂದ ತೆರಳಿದ ಮೇಲೆ ಪತಿಯೂ ನನ್ನ ಮೇಲರಗಿದ. ಗೆಳೆಯನಿಂದ ಅತ್ಯಾಚಾರವಾಗಿದ್ದನ್ನು ಯಾರಿಗಾದರೂ ಹೇಳಿದರೆ ನಿನ್ನ ಸಹೋದರರನ್ನು ಕೊಲ್ಲುವುದಾಗಿ ಬೆದರಿಕೆ ಹಾಕಿದ ಎಂದು ಪೀಡಿತೆ ಅಕ್ಟೋಬರ್ 1 ರಂದು ನೀಡಿದ ದೂರಿನಲ್ಲಿ ತಿಳಿಸಿದ್ದಾಳೆ.
ಪೀಡಿತಳ ಪತಿ ಆರೋಪವನ್ನು ಅಲ್ಲಗಳೆದಿದ್ದಾನೆ. ಆದರೆ ಟಿಂಕು ಆಕೆಯ ಮೇಲೆ ಲೈಂಗಿಕ ದೌರ್ಜನ್ಯವೆಸಗಿದ್ದನ್ನು ಒಪ್ಪಿಕೊಂಡಿದ್ದಾನೆ. ಆ ಸಮಯದಲ್ಲಿ ಪೀಡಿತೆಯ ಪತಿ ಮನೆಯ ಮುಖ್ಯ ಗೇಟ್ ಬಳಿ ನಿಂತುಕೊಂಡು ಎಲ್ಲವನ್ನು ನೋಡುತ್ತಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ.
ಮಹಿಳೆಯನ್ನು ವೈದ್ಯಕೀಯ ಪರೀಕ್ಷೆಗೊಳಪಡಿಸಲಾಗಿದೆ.
ತಾಜಾ ಸುದ್ದಿಗಳನ್ನು ಓದಲು ವೆಬ್‌ದುನಿಯಾ ಮೊಬೈಲ್ ಆ್ಯಪ್ ಡೌನ್‍ಲೋಡ್ ಮಾಡಿಕೊಳ್ಳಿ
