ರಾಯ್ ಬರೇಲಿ: ಮೊದಲೆಲ್ಲಾ ರಾಹುಲ್ ಗಾಂಧಿ ಎಲ್ಲೇ ಹೋದರೂ ಮದುವೆ ಯಾವಾಗ ಎಂದು ಜನ ಪ್ರಶ್ನೆ ಕೇಳುತ್ತಲೇ ಇದ್ದರು. ಅದು ಇತ್ತೀಚೆಗೆ ಕಡಿಮೆಯಾದರೂ ಪೂರ್ತಿ ನಿಂತಿಲ್ಲ. ರಾಯ್ ಬರೇಲಿಯಲ್ಲಿ ಸಮಾವೇಶ ವೇಳೆ ರಾಹುಲ್ ಗೆ ಮದುವೆ ಬಗ್ಗೆ ಪ್ರಶ್ನೆ ಎದುರಾಗಿದೆ.
ರಾಯ್ ಬರೇಲಿಯಿಂದ ರಾಹುಲ್ ಗಾಂಧಿ ಮತ್ತೊಮ್ಮೆ ಸ್ಪರ್ಧೆ ನಡೆಸುತ್ತಿದ್ದಾರೆ. ಇಲ್ಲಿ ಪ್ರಚಾರ ಸಮಾವೇಶದಲ್ಲಿ ಭಾಗಿಯಾಗಿದ್ದಾಗ ಜನರು ರಾಹುಲ್ ಗಾಂಧಿ ಮದುವೆ ಬಗ್ಗೆ ಪ್ರಶ್ನೆ ಮಾಡಿದ್ದಾರೆ. ಜನರ ಒತ್ತಾಯಕ್ಕೆ ಮಣಿದ ರಾಹುಲ್ ಈ ಬಗ್ಗೆ ಪ್ರತಿಕ್ರಿಯಿಸಿದ್ದು, ‘ಇನ್ನು ನಾನು ಬೇಗನೇ ಮದುವೆ ಮಾಡಿಕೊಳ್ಳಬೇಕಾಗುತ್ತದೆ’ ಎಂದಿದ್ದಾರೆ.
ಹೀಗೆ ಹೇಳಿ ನಾಚಿಕೊಂಡು ಅವರು ಮಾತು ಮುಗಿಸಿ ವೇದಿಕೆಯಿಂದ ನಡೆದಿದ್ದಾರೆ. ಈ ವೇಳೆ ವೇದಿಕೆಯಲ್ಲಿದ್ದ ಸಹೋದರಿ ಪ್ರಿಯಾಂಕ ವಾದ್ರಾ ಕೂಡಾ ಜೋರಾಗಿ ನಕ್ಕರು. ಇದಕ್ಕೆ ಮೊದಲು ವೇದಿಕೆಯಲ್ಲಿ ಮಾತನಾಡಿದ ಅವರು ರಾಯ್ ಬರೇಲಿಯಲ್ಲಿ ಸ್ಪರ್ಧಿಸಲು ತೀರ್ಮಾನಿಸಿದ್ದೇಕೆ ಎಂಬ ವಿಚಾರವನ್ನು ಬಿಚ್ಚಿಟ್ಟಿದ್ದಾರೆ.
‘ಒಮ್ಮೆ ನಾನು ನನ್ನ ತಾಯಿ ಜೊತೆ ಕುಳಿತು ಮಾತನಾಡುವಾಗ ನನಗೆ ಇಬ್ಬರು ಅಮ್ಮಂದಿರಿದ್ದಾರೆ ಎಂದೆ. ಅದು ನನ್ನ ತಾಯಿ ಸೋನಿಯಾಜಿ ಮತ್ತು ಅಜ್ಜಿ ಇಂದಿರಾ ಜಿ. ಇಬ್ಬರೂ ನನಗೆ ಸರಿಯಾದ ಮಾರ್ಗದರ್ಶನ ನೀಡಿದವರು. ರಾಯ್ ಬರೇಲಿ ಮತ್ತು ನಮ್ಮ ಕುಟುಂಬಕ್ಕೆ 100 ವರ್ಷಗಳ ಸಂಬಂಧವಿದೆ. ಈ ನೆಲ ನನ್ನ ಇಬ್ಬರೂ ಅಮ್ಮಂದಿರಿಗೆ ಕರ್ಮಭೂಮಿ. ಹೀಗಾಗಿ ನಾನು ಇಲ್ಲಿಂದ ಸ್ಪರ್ಧಿಸಲು ನಿರ್ಧರಿಸಿದೆ’ ಎಂದು ರಾಹುಲ್ ಹೇಳಿದ್ದಾರೆ.
