ಇಬ್ಬರು ಅಪ್ರಾಪ್ತ ಬಾಲಕರು 3 ವರ್ಷದ ಬಾಲಕಿಯನ್ನು ಅಪಹರಿಸಿ ತುಂಡು ತುಂಡಾಗಿ ಕತ್ತರಿಸಿದ ಬೆಚ್ಚಿ ಬೀಳಿಸುವ ಕರಾಳ ಘಟನೆ ಮುಂಬೈನಲ್ಲಿ ನಡೆದಿದೆ.
ನಿನ್ನೆ ರಾತ್ರಿ ನಾಗಪಾಡಾ ಪ್ರದೇಶದ ಕಾಜಿಪುರಾ ಬಳಿ ಬಾಲಕಿಯ ಶವ ಪತ್ತೆಯಾದಾಗ ಪ್ರಕರಣ ಬೆಳಕಿಗೆ ಬಂದಿದೆ.
ಇಬ್ಬರು ಆರೋಪಿಗಳು ಅಪ್ರಾಪ್ತರಾಗಿದ್ದು ಇಂದು ನಸುಕಿನ ಜಾವ ಅವರಿಬ್ಬರನ್ನು ಬಂಧಿಸಲಾಗಿದೆ.
ಘಟನೆಯ ವಿವರ: ಪೊಲೀಸರು ಹೇಳಿರುವ ಪ್ರಕಾರ ಡಿಸೆಂಬರ್ 5 ರಂದು ತಮ್ಮ ಮಗು ಕಾಣುತ್ತಿಲ್ಲ ಎಂದು ಅದರ ಪೋಷಕರು ಜೆ.ಜೆ ಮಾರ್ಗ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದರು. ಬಳಿಕ ಅವರಿಗೆ ಅಪರಿಚಿತರಿಬ್ಬರು ದೂರವಾಣಿ ಕರೆ ಮಾಡಿದ್ದು ನಿಮ್ಮ ಮಗು ಬೇಕಾದರೆ 1 ಕೋಟಿ ರೂಪಾಯಿ ನೀಡುವಂತೆ ಬೇಡಿಕೆಯನ್ನಿಟ್ಟಿದ್ದರು. ಅಷ್ಟೊಂದು ದೊಡ್ಡ ಮೊತ್ತದ ಹಣವನ್ನು ಹೊಂದಿಸಲಾಗುವುದಿಲ್ಲ. 28 ಲಕ್ಷ ಕೊಡುತ್ತೇನೆ ಎಂದು ಮಗುವಿನ ತಂದೆ ಭರವಸೆ ನೀಡಿದ್ದ. ಬಳಿಕ ಅಪಹರಣಕಾರರು ಥಾಣೆಯ ಕಲ್ವಾ ನಗರದ ಬಳಿ ಬಂದು ಹಣ ನೀಡಿ ಮಗುವನ್ನು ಕರೆದೊಯ್ಯುವಂತೆ ಹೇಳಿದ್ದರು.
ಏತನ್ಮಧ್ಯೆ ಮಗುವಿನ ನೆರೆಮನೆ ಹುಡುಗನೊಬ್ಬ ಅನುಮಾನಾಸ್ಪದವಾಗಿ ನಡೆದುಕೊಳ್ಳುತ್ತಿದ್ದು ಆತನನ್ನು ಬಂಧಿಸಿ ವಿಚಾರಣೆಗೊಳಪಡಿಸಿದ ಪೊಲೀಸರು ಸತ್ಯವನ್ನು ಹೊರಹಾಕಿಸಿದ್ದಾರೆ.
ಮಗುವನ್ನು ಅಪಹರಿಸಿದ ದಿನವೇ ಮೊಬೈಲ್ ಚಾರ್ಜರ್ ವೈಯರ್‌ನಿಂದ ಆಕೆಯನ್ನು ಉಸಿರುಗಟ್ಟಿಸಿ ಕೊಂದು ತುಂಡು ತುಂಡಾಗಿಸಿ ಶವವನ್ನು ಕಾಜಿಪುರಾ ಬಳಿ ಎಸೆದಿದ್ದಾಗಿ ಆತ ಬಾಯ್ಬಿಟ್ಟಿದ್ದ. ಮಗುವಿನ ಶವವನ್ನು ಮರಣೋತ್ತರ ಪರೀಕ್ಷೆಗಾಗಿ ಕಳುಹಿಸಲಾಗಿದೆ.
