ಶನಿವಾರ ತಮ್ಮ 66 ನೇ ಜನ್ಮದಿನವನ್ನಾಚರಿಸಿಕೊಂಡ ಪ್ರಧಾನಿ ಮೋದಿ ದಿವ್ಯಾಂಗ ಮಕ್ಕಳ ಜತೆ ದಿನ ಕಳೆದಿದ್ದು ನಿಮಗ ಗೊತ್ತೇ ಇರಲಿಕ್ಕೆ ಸಾಕು. ಅದು ಮೋದಿ ಅವರು ಪುಟ್ಟ ಮಗುವನ್ನು ಎತ್ತಿಕೊಂಡು ಮಾತನಾಡಿಸಿದ ವಿಡಿಯೋವೀಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿ ಹರಿದಾಡುತ್ತಿದೆ.
ನವಸಾರಿಯಲ್ಲಿ ಆಯೋಜಿಸಲಾಗಿದ್ದ ಕಾರ್ಯಕ್ರಮದಲ್ಲಿ ಮೋದಿ ದಿವ್ಯಾಂಗರಿಗೆ ಕಿಟ್ ನೀಡಿದರು. ಸಮಾರಂಭದಲ್ಲಿ ಭಾಗವಹಿಸಿದ್ದ ದೃಷ್ಟಿ ದೋಷವಿದ್ದ ಪುಟ್ಟ ಮಗು ಗೌರಿ ಶಾರ್ದೂಲ್‌ಳನ್ನು ಎತ್ತಿಕೊಂಡ ಪ್ರಧಾನಿ ಆಕೆಯನ್ನು ವಾತ್ಸಲ್ಯದಿಂದ ಮಾತನಾಡಿಸಿ ರಾಮಾಯಣವನ್ನು ಹೇಳುವಂತೆ, 'ಬೋಲೋ ಬೇಟಾ ಬೋಲ್'( ಹೇಳು ಕಂದ ಹೇಳು) ಎಂದು ಹುರಿದುಂಬಿಸಿದರು.
ಧ್ವನಿವರ್ಧಕದ ಮುಂದೆ ಮೋದಿ ಅವರ ಮಡಿಲಲ್ಲಿ ನಿಂತಿದ್ದ ಮಗು,'ನನ್ನ ಹೆಸರು ಗೌರಿ, ನಾನು ಪೂಜಾ ಮತ್ತು ಯೋಗಿ ರಾಜ್ ಎಂಬುವವರ ಮಗಳಾಗಿದ್ದು ಒಂದನೆಯ ತರಗತಿಯಲ್ಲಿ ಓದುತ್ತಿದ್ದೇನೆ ಎಂದು ಹೇಳಿದಳು. ಬಳಿಕ ಪ್ರಧಾನಿ ಅವರ ಮಾತಿಗೆ ಒಪ್ಪಿ ರಾಮಾಯಣವನ್ನು ಸಹ ಪಟಪಟನೆ ಹೇಳಿ ಎಲ್ಲರಿಗೂ ಆಶ್ಚರ್ಯ ಮೂಡಿಸಿದಳು.
ಬಳಿಕ ಮಾತನಾಡಿದ ಪ್ರಧಾನಿ ಈ ದಿನವನ್ನು ದಿವ್ಯಾಂಗರ ಜತೆ ಕಳೆಯುತ್ತಿರುವುದು ನನ್ನ ಅದೃಷ್ಟ. ಈ ಮೊದಲು ಪ್ರಧಾನಿಯೊಬ್ಬರು ಈ ರೀತಿ ಮಾಡಿದ್ದರೇ? ಎಂದು ಗುಜರಾತಿಯಲ್ಲಿ ನೆರೆದವರನ್ನು ಪ್ರಶ್ನಿಸಿದರು.
'ದಿವ್ಯಾಂಗರನ್ನು ಅನುಕಂಪದಿಂದ ನೋಡಬೇಡಿ. ಅವರಿಗೂ ಆತ್ಮಗೌರವವಿದೆ, ಅವರು ಸಮಾನತೆಗೆ ಹಕ್ಕುದಾರರು', ಎಂದ ಪ್ರಧಾನಿ 'ಹೆಣ್ಣುಮಕ್ಕಳ ವಿಷಯದಲ್ಲೂ ನಿಮ್ಮ ದೃಷ್ಟಿಕೋನವನ್ನು ಬದಲಿಸಿಕೊಳ್ಳಿ', ಎಂದರು. ಜತೆಗೆ ಸಂಕೇತ ಭಾಷೆಯಲ್ಲಿ ಸಾರ್ವತ್ರಿಕ ಪಠ್ಯಕ್ರಮವನ್ನು ಸಹ ಅವರು ಘೋಷಿಸಿದರು.
ಶನಿವಾರ ನಡೆದ ಕಾರ್ಯಕ್ರಮದಲ್ಲಿ 11,232 ದಿವ್ಯಾಂಗರಿಗೆ ಗಾಲಿಕುರ್ಚಿ, ಟ್ರೈ- ಸೈಕಲ್ಸ್, ಸ್ಮಾರ್ಟ್ ಸ್ಟಿಕ್ಸ್, ಸ್ಮಾರ್ಟ್ ಫೋನ್, ಬುದ್ಧಿಮಾಂದ್ಯರಿಗೆ ವಿಶೇಷ ಸಾಫ್ಟವೇರ್‌ಗಳುಳ್ಳ ಲ್ಯಾಪ್‌ಟಾಪ್, ಬ್ರೈಲ್ ಲಿಪಿಗಳು, ಕ್ಯಾಲಿಪರ್ಸ್ ಏಡ್ ಮತ್ತು ಇತರೇ ಉಪಕರಣಗಳನ್ನು ನೀಡಲಾಯಿತು. ಈ ಮೂಲಕ 3 ವಿಶ್ವ ದಾಖಲೆಗಳನ್ನು ದಾಖಲಿಸಲಾಗಿದೆ.
ದಿವ್ಯಾಂಗ ಮಗುವನ್ನೆತ್ತಿಕೊಂಡು ರಾಮಾಯಣ ಹೇಳಿಸಿದ ಮೋದಿ( ವೈರಲ್ ವಿಡಿಯೋ)
