ತಾಕತ್ತಿದ್ದರೆ ಪಂಜಾಬ್ ವಿಧಾನಸಭಾ ಚುನಾವಣೆಯಲ್ಲಿ ನನ್ನ ವಿರುದ್ಧ ಸ್ಪರ್ಧಿಸಿ ಎಂದು ಪಂಜಾಬ್ ಕಾಂಗ್ರೆಸ್ ಮುಖ್ಯಸ್ಥ ಅಮರಿಂದರ್ ಸಿಂಗ್ ದೆಹಲಿ ಮುಖ್ಯಮಂತ್ರಿ ಅರವಿಂದ ಕೇಜ್ರಿವಾಲ್ ಅವರಿಗೆ ಸವಾಲೆಸೆದಿದ್ದಾರೆ.
ನೀವು ಪಂಜಾಬ್ ಮುಖ್ಯಮಂತ್ರಿ ಪ್ರಕಾಶ್ ಸಿಂಗ್ ಬಾದಲ್, ಉಪಮುಖ್ಯಮಂತ್ರಿ ಸುಖಬಿರ್ ಬಾದಲ್ ಮತ್ತು ಜೂನಿಯರ್ ಬಾದಲ್ ಬಾವ ಬಿಕಾರಾಮ್ ಮಜಿಥಿಯಾ ವಿರುದ್ಧ ಕಣಕ್ಕಿಳಿಯುತ್ತೀರೋ ಅಥವಾ ಸುರಕ್ಷಿತ ಕ್ಷೇತ್ರದಿಂದ ಕಣಕ್ಕಿಳಿಯುತ್ತೀರೋ ಎಂದು ಕೇಜ್ರಿವಾಲ್ ಅಮರಿಂದರ್ ಸಿಂಗ್ ಉದ್ದೇಶಿಸಿ ಈ ಹಿಂದೆ ಟ್ವೀಟ್ ಮಾಡಿದ್ದರು.
ಅದಕ್ಕೆ ಉತ್ತರವಾಗಿ ಪಂಜಾಬ್ ಮಾಜಿ ಮುಖ್ಯಮಂತ್ರಿ ಮತ್ತು ಪಂಜಾಬ್‌ನಲ್ಲಿ ಪಕ್ಷದ ಪ್ರಚಾರದ ಉಸ್ತುವಾರಿ ಹೊತ್ತಿರುವ ಸಿಂಗ್, ಪಂಜಾಬ್‌ನಲ್ಲಿ ಬಾದಲ್ ಚಾಪ್ಟರ್ ಮುಗಿದಿದೆ. ಹೀಗಾಗಿ ನೀವು ಬಂದು ಇಲ್ಲಿನ ಚುನಾವಣೆಯನ್ನೆದುರಿಸಿ, ನನ್ನ ವಿರುದ್ಧ ಕಣಕ್ಕಿಳಿಯಿರಿ ಎಂದು ನೇರ ಸವಾಲೆಸೆದಿದ್ದಾರೆ.