ಬಾಲಕಿ ಮೇಲೆ ಗ್ಯಾಂಗ್ ರೇಪ್ ಎಸಗಿ ಮೈಮೇಲೆ ಬೈಕ್ ಹರಿಸಿದರು

ಅಪ್ರಾಪ್ತ ವಯಸ್ಸಿನ ಬಾಲಕಿಯ ಮೇಲೆ ಸಾಮೂಹಿಕ ಅತ್ಯಾಚಾರವೆಸಗಿ, ಮನಬಂದಂತೆ ಥಳಿಸಿ ಮೈಮೇಲೆ ಬೈಕ್ ಹರಿಸಿದ ಅಮಾನವೀಯ ಘಟನೆ ರಾಜಸ್ಥಾನದ ಚುರುವಿನಲ್ಲಿ ನಡೆದಿದೆ. 

ಕ್ರಿಸ್ಮಸ್ ಮುನ್ನಾ ದಿನದಂದು ಈ ಹೇಯ ಕೃತ್ಯ ನಡೆದಿದ್ದು ಬಹಳ ತಡವಾಗಿ ಬೆಳಕಿಗೆ ಬಂದಿದೆ. 

ಆಕೆಗೆ ಸೊಂಟದಿಂದ ಕೆಳಗಿನ ಭಾಗ, ಮೂತ್ರಕೋಶ ಮತ್ತು ಕರುಳಿನ ಮೇಲೆ ನಿಯಂತ್ರಣವಿಲ್ಲದಿದುದರಿಂದ, ಬದುಕುಳಿದಿದ್ದರೂ ಜೀವಂತ ಶವವಾಗಿದ್ದಾಳೆ. 

ಘಟನೆ ವಿವರ: ಕೂಲಿ ಕಾರ್ಮಿಕರ ಮಗಳಾದ ಪೀಡಿತೆ ಮನೆಯಲ್ಲಿ ಒಬ್ಬಳೇ ಇದ್ದ ಸಮಯ ನೋಡಿ ಆಕೆಗೆ ಪರಿಚಿತರೇ ಆಗಿದ್ದ ರಾಕೇಶ್ ಮತ್ತು ನರೇಶ್ ಎಂಬುವವರು ಎಳೆದೊಯ್ದಿದ್ದರು. ಡಿಸೆಂಬರ್ 25 ರಂದು ಬೆಳಗಿನ ಜಾವ ಮೂರು ಗಂಟೆ ಸುಮಾರಿಗೆ ಈ ಘಟನೆ ನಡೆದಿತ್ತು.

ಆಕೆಯ ಮೇಲೆ ಬಲಾತ್ಕಾರವೆಸಗಿದ ಬಳಿಕ ಯಾರಿಗೂ ಹೇಳದಂತೆ ಕೀಚಕರು ಬೆದರಿಕೆ ಒಡ್ಡಿದ್ದಾರೆ. ಅಷ್ಟೇ ಅಲ್ಲದೇ ಆಕೆಯ ಮೇಲೆ ಬೈಕ್ ಹರಿಸಿ ಕೊಲ್ಲಲು ಪ್ರಯತ್ನಿಸಿದ್ದಾರೆ. 

ಬಾಲಕಿಯ ಬೆನ್ನು ಹುರಿಗೆ ಸಹ ಗಂಭೀರ ಗಾಯಗಳಾಗಿದ್ದು ಆಕೆಯನ್ನು ಜೈಪುರದ ಆಸ್ಪತ್ರೆಗೆ ದಾಖಲಿಸಲಾಗಿದೆ. 

ಅಲ್ವರ್‌ನಲ್ಲಿ ಕಾರ್ಮಿಕರಾಗಿರುವ ತಂದೆ ಗ್ರಾಮಕ್ಕೆ ಹಿಂತಿರುಗಿದಾಗ ಮಗಳ ಸ್ಥಿತಿಯನ್ನು ಕಂಡು ಆಘಾತಗೊಂಡಿದ್ದಾರೆ ಮತ್ತು ಈ ಕುರಿತು ಪೊಲೀಸರಿಗೆ ದೂರು ನೀಡಿದ್ದಾರೆ.  

ಆರೋಪಿಗಳನ್ನು ಬಂಧಿಸಿ ನ್ಯಾಯಾಂಗ ವಶಕ್ಕೆ ಒಪ್ಪಿಸಲಾಗಿದೆ.