ಮಹಿಳೆಯರಿಗೆ ಲೈಂಗಿಕ ಕಿರುಕುಳ ನೀಡುತ್ತಿರುವ ಆರೋಪಿಗಳನ್ನು ಬಂಧಿಸಲು ಮಫ್ತಿಯಲ್ಲಿದ್ದ ಮಹಿಳಾ ಪೊಲೀಸ್ ಪೇದೆ ಲೈಂಗಿಕ ಕಿರುಕುಳಕ್ಕೆ ಗುರಿಯಾದ ಘಟನೆ ವರದಿಯಾಗಿದೆ.
ಫ್ರೆಜರ್ ಟೌನ್‌ಬಳಿಯಿರುವ ಕೋಲೆಸ್ ಪಾರ್ಕ್‌ನಲ್ಲಿ ಮಹಿಳೆಯರಿಗೆ ಲೈಂಗಿಕ ಕಿರುಕುಳ ನೀಡಲಾಗುತ್ತಿದೆ ಎನ್ನುವ ದೂರುಗಳು ಹೆಚ್ಚಾದ ಹಿನ್ನೆಲೆಯಲ್ಲಿ ಆರೋಪಿಗಳನ್ನು ಹಿಡಿಯಲು ಪಾರ್ಕ್‌ನಲ್ಲಿ ಮಹಿಳಾ ಪೊಲೀಸ್ ಪೇದೆಗಳನ್ನು ಮುಫ್ತಿಯಲ್ಲಿ ಹಾಕಲಾಗಿತ್ತು.ಆದರೆ, ಆರೋಪಿ ಹಯಾಜ್ ಪಾಶಾ, ಮಹಿಳಾ ಪೊಲೀಸ್ ಎನ್ನುವುದು ಅರಿಯದೆ ಅವರಿಗೆ ಲೈಂಗಿಕ ಕಿರುಕುಳ ನೀಡಲು ಆರಂಭಿಸಿದ್ದಾನೆ. ನಂತರ ಮಹಿಳಾ ಪೊಲೀಸರು ಆತನನ್ನು ಬಂಧಿಸಿ ಜೈಲಿಗೆ ಅಟ್ಟಿದ್ದಾರೆ.
ಮಹಿಳಾ ಪೊಲೀಸ್ ಪೇದೆ ಲಕ್ಷ್ಮಿಬಾಯಿ ವಾಗ್ಪೋಡಿ ಮತ್ತು ಹೋಮ್‌ಗಾರ್ಡ್ ಪುಷ್ಪಾ ಎನ್ನುವವರು ನಿನ್ನೆ ಸಂಜೆ 5.30ಕ್ಕೆ ಪಾರ್ಕ್‌ಗೆ ತೆರಳಿದ್ದಾರೆ. ಅಲ್ಲಿದ್ದ ಆರೋಪಿ ಪಾಶಾ ಇಬ್ಬರಿಗೆ ಅಸಭ್ಯ ಸಂಕೇತಗಳನ್ನು ತೋರಿಸಿದ್ದಾನೆ. ಕೆಲ ಹೊತ್ತಿನ ನಂತರ ಆರೋಪಿ ಪಾಶಾ ಇತರ ಮಹಿಳೆಯರಿಗೂ ಅದೇ ರೀತಿ ಅಸಭ್ಯ ವರ್ತನೆ ತೋರಿದ್ದಾನೆ. ಕೂಡಲೇ ಮಹಿಳಾ ಪೊಲೀಸ್ ಪೇದೆ ಲಕ್ಷ್ಮಿಬಾಯಿ ಹೊಯ್ಸಳಗೆ ಕರೆ ಮಾಡಿ ಕರೆಸಿದ ನಂತರ ಆರೋಪಿಯನ್ನು ಬಂಧಿಸಲಾಗಿದೆ ಎಂದು ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ.
ಆರೋಪಿ ಪಾಶಾ ವೃತ್ತಿಯಲ್ಲಿ ಪೇಂಟರ್‌ ಆಗಿದ್ದು, ಘಟನೆ ನಡೆದ ಸಂದರ್ಭದಲ್ಲಿ ಕುಡಿದ ಮತ್ತಿನಲ್ಲಿದ್ದ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.
ತಾಜಾ ಸುದ್ದಿಗಳನ್ನು ಓದಲು ವೆಬ್‌ದುನಿಯಾ
ಮೊಬೈಲ್ ಆ್ಯಪ್ ಡೌನ್‍ಲೋಡ್ ಮಾಡಿಕೊಳ್ಳಿ.
