ಆಫ್ರಿಕಾ ಖಂಡದ ಕೆಟಾರಲ್ ಜ್ವರಕ್ಕೆ ನೂರಾರು ಹಸುಗಳು ಬಲಿ

ತುಮಕೂರು ಜಿಲ್ಲೆಯ ಕುಣಿಗಲ್ ತಾಲ್ಲೂಕಿನಲ್ಲಿ ಆಫ್ರಿಕಾ ಖಂಡದ ಪ್ರಾಣಿಗಳಲ್ಲಿ ಕಂಡು ಬರುವ ಕೆಟಾರಲ್(ಎಂಸಿಎಫ್) ಅಂಟು ರೋಗ ಕಂಡು ಬಂದಿದೆ. ಮೊದೂರು, ಹೊಸೂರು ಗ್ರಾಮಗಳಲ್ಲಿ ಈ ಭಯಾನಕ ರೋಗ ಕಂಡು ಬಂದಿದ್ದು ಇದುವರೆಗೂ 400 ಕ್ಕೂ ಹೆಚ್ಚು ಹಸುಗಳು ಸಾವನ್ನಪ್ಪಿವೆ. ಲಕ್ಷಾಂತರ ಮೌಲ್ಯದ ಹಸುಗಳು ಇದ್ದಕ್ಕಿದ್ದಂತೆ ಸಾವನ್ನಪ್ಪುತ್ತಿರುವುದು ಗ್ರಾಮಸ್ಥರಲ್ಲಿ ಆತಂಕ ಸೃಷ್ಟಿ ಮಾಡಿದೆ.

ಈ ರೋಗ ಹಸುಗಳಲ್ಲಷ್ಟೇ ಅಲ್ಲದೆ ಸಾಕು ಪ್ರಾಣಿಗಳಾದ ಕುರಿ, ಮೇಕೆ, ಎಮ್ಮೆ, ನಾಟಿ ಹಸುಗಳಲ್ಲಿಯೂ ಕಂಡು ಬರುತ್ತಿದೆ. ಹತ್ತಾರು ಬಾರಿ ಪಶುವೈದ್ಯರು ಗ್ರಾಮಗಳಿಗೆ ಭೇಟಿ ನೀಡಿ ಚಿಕಿತ್ಸೆ ನೀಡಿದ್ರು ರೋಗ ನಿಯಂತ್ರಿಸಲು ಸಾದ್ಯವಾಗಿಲ್ಲ. ಮೃತ ಹಸುಗಳ ರಕ್ತ ಮಾದರಿಯನ್ನ ಪರೀಕ್ಷೆಗೊಳಪಡಿಸಿದ ವೈದ್ಯರು ಕೆಟಾರಲ್ ( ಎಂಸಿಎಫ್ ) ಎಂಬುದಾಗಿ ಪತ್ತೆ ಹಚ್ಚಿದ್ದಾರೆ.

ಈ ರೋಗ ನಿಯಂತ್ರಣ ಸಾಧ್ಯವಿಲ್ಲ  ಸತ್ತ ಹಸುಗಳನ್ನ ಸರಿಯಾದ ರೀತಿಯಲ್ಲಿ ಸಂಸ್ಕಾರ ಮಾಡಿ ಬೇರೆ ಹಸುಗಳಿಗೆ ಹರಡಂತೆ ಕಾಪಾಡಬೇಕು ಅಷ್ಟೇ ಎಂದು ವೈದ್ಯರು ಕೈಚೆಲ್ಲಿದ್ದಾರೆ. ಗ್ರಾಮದಲ್ಲಿ ದಿನೆ ದಿನೇ ಕೆಟಾರಲ್ ರೋಗಕ್ಕೆ ಹಸುಗಳು ಸಾವನ್ನಪ್ಪುತ್ತಿದ್ದು ಗ್ರಾಮಸ್ಥರು ಆತಂಕ ವ್ಯಕ್ತ ಪಡಿಸಿದ್ದಾರೆ.