ಬೆಂಗಳೂರು: ಕೊರೋನಾ ಈ ವರ್ಷದ ಬಹುಪಾಲು ದಿನಗಳನ್ನು ನುಂಗಿ ಹಾಕಿದೆ. ಹಾಗಿದ್ದರೂ ಅಲ್ಪ ಅವಧಿಯಲ್ಲಿ ಹಿಟ್ ಆದ ಸಿನಿಮಾಗಳು ಯಾವುವು ನೋಡೋಣ.
2020 ರಲ್ಲಿ ಬಿಡುಗಡೆಯಾಗಿದ್ದ ಕೆಲವೇ ಸಿನಿಮಾಗಳು. ಅದರಲ್ಲಿ ಹಿಟ್ ಆಗಿದ್ದು ರಮೇಶ್ ಅರವಿಂದ್ ನಾಯಕರಾಗಿದ್ದ ‘ಶಿವಾಜಿ ಸುರತ್ಕಲ್’, ಹೊಸಬರ ‘ದಿಯಾ’, ಡಾರ್ಲಿಂಗ್ ಕೃಷ್ಣ ಮೊದಲ ಬಾರಿಗೆ ನಿರ್ದೇಶಿಸಿ ನಟಿಸಿದ್ದ ‘ಲವ್ ಮಾಕ್ಟೇಲ್’, ಪುನೀತ್ ರಾಜಕುಮಾರ್ ನಿರ್ಮಾಣ ಸಂಸ್ಥೆಯಲ್ಲಿ ಮೂಡಿಬಂದ ‘ಮಾಯಾಬಜಾರ್ 2016’, ಚಿರಂಜೀವಿ ಸರ್ಜಾರ ‘ಶಿವಾರ್ಜುನ’ ಸಿನಿಮಾಗಳು ಉತ್ತಮ ಪ್ರದರ್ಶನ ಕಂಡಿದ್ದವು. ಇದಾದ ಬಳಿಕ ಲಾಕ್ ಡೌನ್ ಆಗಿದ್ದರಿಂದ ಈ ಎಲ್ಲಾ ಸಿನಿಮಾಗಳ ಗಳಿಕೆ ಮೇಲೆ ಪರಿಣಾಮ ಬೀರಿತ್ತು.
ಲಾಕ್ ಡೌನ್ ಮುಗಿದ ಬಳಿಕ ಈ ಪೈಕಿ ಬಹುತೇಕ ಸಿನಿಮಾಗಳು ರಿ ರಿಲೀಸ್ ಆದರೂ ಮತ್ತೆ ಉತ್ತಮ ಪ್ರದರ್ಶನ ಕಂಡಿದ್ದು ಚಿರಂಜೀವಿ ಸರ್ಜಾರ ಶಿವಾರ್ಜುನ ಮಾತ್ರ. ಬಹುಶಃ ಅವರ ಅಕಾಲಿಕ ಮರಣವೂ ಇದಕ್ಕೆ ಕಾರಣವೆನ್ನಬಹುದು. ಆದರೆ ಲಾಕ್ ಡೌನ್ ಮುಗಿದ ಬಳಿಕ ಯಜ್ಞಾ ಶೆಟ್ಟಿ, ಸಂಚಾರಿ ವಿಜಯ್ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದ ‘ಆಕ್ಟ್ 1978’ ಸಿನಿಮಾ ಬಿಡುಗಡೆಯಾಗಿ ಉತ್ತಮ ಪ್ರದರ್ಶನ ಕಾಣುತ್ತಿದೆ. ಒಟ್ಟಾರೆ ಈ ವರ್ಷ ಹೊಸಬರ ಸಿನಿಮಾಗಳಿಗೆ, ಕತೆಯೇ ಜೀವಾಳವಾಗಿರುವ ಉತ್ತಮ ಸಿನಿಮಾಗಳಿಗೆ ಪ್ರೇಕ್ಷಕ ಜೈ ಎಂದಿದ್ದಾನೆ ಎನ್ನಬಹುದು.
