ತಾಯಿ ಎಂದರೆ ಅದಕ್ಕೆ ಸಾಟಿಯಾದುದು ಏನೂ ಇಲ್ಲ. ತಾನು ಹಡೆದ ಮಕ್ಕಳಿಗಾಗಿ ಜೀವವನ್ನು ನೀಡಲು ಆಕೆ ಹಿಂದೆ ಮುಂದೆ ನೋಡುವುದಿಲ್ಲ. ಅದಕ್ಕೆ ಸಾಕ್ಷಿ ಈ ವಿಡಿಯೋ. ಸಿಂಹದ ಬಾಯಿಗೆ ಸಿಕ್ಕ ಮಗುವನ್ನು ರಕ್ಷಿಸಲು ತಾಯಿ ಜಿರಾಫೆಯೊಂದು ಸಾಕಷ್ಟು ಹರಸಾಹಸ ಮಾಡಿದ ದೃಶ್ಯಾವಳಿಯೊಂದು ಕ್ಯಾಮರಾ ಕಣ್ಣಲ್ಲಿ ಸೆರೆಯಾಗಿದ್ದು ಹೃದಯ ಕಲಕುವಂತಿದೆ.
ದಕ್ಷಿಣ ಆಫ್ರಿಕಾದ ಪಲನ್ಸ್ ಬರ್ಗ್ ಗೇಮ್ ರಿಸರ್ವ್‌‌ನಲ್ಲಿ ಈ ಕಣ್ಣೀರು ತರಿಸುವ ದೃಶ್ಯಾವಳಿಯನ್ನು ಸೆರೆ ಹಿಡಿಯಲಾಗಿದೆ.
ತಾಯಿ ಮತ್ತು ಮಗು ಜಿರಾಫೆ ಸಂತೋಷದಿಂದ ವಿಹರಿಸುತ್ತಿದ್ದಾಗ ಸಿಂಹದ ಗುಂಪು ದಾಳಿ ಮಾಡಿದೆ. ತಾಯಿ ಸಿಂಹದ ಬಾಯಿಂದ ತಪ್ಪಿಸಿಕೊಳ್ಳಲು ಯಶಸ್ವಿಯಾಯಿತು. ಆದರೆ ಮರಿ, ಕಾಡಿನ ರಾಜನ ಬಾಯಿಗೆ ಸಿಕ್ಕಿ ಬಿದ್ದಿದೆ. ಮಗುವನ್ನು ರಕ್ಷಿಸಲು ತಾಯಿ ಸಿಂಹವನ್ನೇ ಎದುರಿಸಲು ನಿಂತಿದ್ದಾಳೆ. ಆದರೆ ಆ ಕ್ರೂರ ಪ್ರಾಣಿಯ ಮುಂದೆ ತಾಯಿಯ ಆಟ ನಡೆದಿಲ್ಲ. ಗಂಭೀರವಾಗಿ ಗಾಯಗೊಂಡಿದ್ದ ಮುದ್ದು ಮರಿ ರಸ್ತೆ ಬದಿಯಲ್ಲಿ ಬಂದು ಬಿದ್ದಿದೆ. ಒದ್ದಾಡುತ್ತಿದ್ದ ಮಗುವಿನ ಮುಂದೆ ನಿಸ್ಸಹಾಯಕಳಾಗಿ ಸುತ್ತಾಡುತ್ತಿದ್ದ ತಾಯಿ ಶವವನ್ನು ಎಳೆದೊಯ್ಯಲು ಬಂದ ಸಿಂಹಗಳನ್ನು ಮತ್ತೆ ಓಡಿಸಿದೆ. ಕೊನೆಗೂ ಆ ತಾಯಿಯ ಮಗುವನ್ನು ಎಳೆದೊಯ್ದ ಸಿಂಹಗಳು ಆಕೆಯ ಮುಂದೆಯೇ ಅದನ್ನು ತಿಂದು ಮುಗಿಸಿವೆ.
ತನ್ನ ಮರಿ ಸತ್ತ ಎರಡು ದಿನಗಳಾದರೂ ತಾಯಿ ಅದೇ ಪ್ರದೇಶದಲ್ಲಿ ಸುತ್ತಾಡುತ್ತಿತ್ತು ಎಂದು ಅರಣ್ಯ ಸಿಬ್ಬಂದಿ ಹೇಳಿದ್ದಾರೆ.
ಹೃದಯವಿದ್ರಾವಕ: ಮಗುವನ್ನು ರಕ್ಷಿಸಲು ಸಿಂಹಗಳನ್ನೇ ಎದುರಿಸಿದ ತಾಯಿ (ವಿಡಿಯೋ)