ಹೈದರಾಬಾದ್ ರಣಜಿ ಆಟಗಾರ ತನ್ಮಯ್ ಅಗರ್ ವಾಲ್ ತಲೆಗೆ ಚೆಂಡು ಬಡಿದು ಗಾಯ

ಅಹಮ್ಮದಾಬಾದ್: ಛತ್ತೀಸ್ ಘಡ ವಿರುದ್ಧ ನಡೆದ ರಣಜಿ ಟ್ರೋಫಿ ಪಂದ್ಯದ ವೇಳೆ ಹೈದಾರಾಬಾದ್ ಆಟಗಾರ ತನ್ಮಯ್ ಅಗರ್ ವಾಲ್ ತಲೆಗೆ ಚೆಂಡು ಬಡಿದು ಗಂಭೀರ ಗಾಯಗೊಂಡಿದ್ದು ಆಸ್ಪತ್ರೆಗೆ ದಾಖಲಾಗಿದ್ದಾರೆ.

ಫೀಲ್ಡಿಂಗ್ ಮಾಡುತ್ತಿದ್ದ ತನ್ಮಯ್ ಚೆಂಡು ತಲೆಗೆ ಬಿದ್ದ ತಕ್ಷಣ ಕುಸಿದು ಬಿದ್ದಿದ್ದಾರೆ. ಆದರೆ ಅವರಿಗೆ ಪ್ರಜ್ಞೆ ಬಂದಿದ್ದರೂ, ತಲೆ ಸುತ್ತಿದ ಅನುಭವವಾಗುತ್ತಿದೆ ಎಂದ ಕಾರಣ ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಲಾಯಿತು. ಮೈದಾನದಲ್ಲೇ ಇದ್ದ ವೈದ್ಯಕೀಯ ತಂಡ ಪ್ರಾಥಮಿಕ ಚಿಕಿತ್ಸೆ ನೀಡಿತು.

ಆಸ್ಪತ್ರೆಗೆ ದಾಖಲಿಸಿದ ಮೇಲೆ ಸ್ಕ್ಯಾನಿಂಗ್ ಮಾಡಲಾಗಿದ್ದು, ವರದಿ ಬಂದ ನಂತರವೇ ಗಾಯದ ಗಂಭೀರತೆ ಅರಿವಾಗಲಿದೆ. ಭಾರತದಲ್ಲಿ ಹಿಂದೊಮ್ಮೆ ಸ್ಪಿನ್ನರ್ ಪ್ರಗ್ಯಾನ್ ಓಝಾ ಕೂಡಾ ಇದೇ ರೀತಿ ತಲೆಗೆ ಚೆಂಡು ತಗಲಿ ಗಾಯಗೊಂಡಿದ್ದರು. ಆಸ್ಟ್ರೇಲಿಯಾದಲ್ಲಿ ಚೆಂಡು ತಗಲಿ ಸಾವನ್ನಪ್ಪಿದ ಫಿಲಿಪ್ ಹ್ಯೂಸ್ ಪ್ರಕರಣ ಯಾರೂ ಮರೆಯುವಂತಿಲ್ಲ.

ತಾಜಾ ಸುದ್ದಿಗಳನ್ನು ಓದಲು ವೆಬ್‌ದುನಿಯಾ ಮೊಬೈಲ್ ಆ್ಯಪ್ ಡೌನ್‍ಲೋಡ್ ಮಾಡಿಕೊಳ್ಳಿ