ಮುಂಬೈ: ಇತ್ತೀಚೆಗೆ ಯಾಕೋ ಕೋಚ್ ಅನಿಲ್ ಕುಂಬ್ಳೆಗೆ ಸಂಕಷ್ಟದ ಕಾಲ ಶುರುವಾಗಿದೆ ಎನ್ನುಬಹುದೇನೋ. ಕೊಹ್ಲಿ ಮತ್ತು ಕುಂಬ್ಳೆ ನಡುವೆ ಭಿನ್ನಾಭಿಪ್ರಾಯವಿದೆ ಎಂಬ ಸುದ್ದಿ ಬಂದ ಬೆನ್ನಲ್ಲೇ ಮಾಧ್ಯಮಗಳು, ಬಿಸಿಸಿಐಯ ಅನಾಮಧೇಯ ಮೂಲಗಳು ಕುಂಬ್ಳೆ ಮೇಲೆ ದಿನಕ್ಕೊಂದು ಸುದ್ದಿ ಹಬ್ಬುತ್ತಲೇ ಇದ್ದಾರೆ.
ಇದೀಗ ಟೀಂ ಇಂಡಿಯಾದ ಹಿರಿಯ ಆಟಗಾರರ ಜತೆಗಿನ ವಾಟ್ಸಪ್ ಸಂಭಾಷಣೆಯನ್ನು ಕುಂಬ್ಳೆ ತಮ್ಮ ಮಾಧ್ಯಮ ಮಿತ್ರರಿಗೆ ಲೀಕ್ ಮಾಡಿದ್ದಾರೆ ಎಂದು ವರದಿಯೊಂದು ಹೇಳುತ್ತಿದೆ. ಇದು ಎಷ್ಟು ಸತ್ಯ, ಎಷ್ಟು ಸುಳ್ಳು ಎಂಬುದಂತೂ ಗೊತ್ತಿಲ್ಲ. ಆದರೂ ಕುಂಬ್ಳೆ ಮೇಲೆ ಆರೋಪಗಳು ನಿಂತಿಲ್ಲ.
ಕುಂಬ್ಳೆ ತಮ್ಮ ಆಪ್ತ ಮಾಧ್ಯಮ ಮಿತ್ರರಿಗಾಗಿ ವಾಟ್ಸಪ್ ಗ್ರೂಪ್ ಕ್ರಿಯೇಟ್ ಮಾಡಿದ್ದರು. ಈ ಗ್ರೂಪ್ ನಲ್ಲಿ ಒಂದಕ್ಕಿಂತ ಹೆಚ್ಚು ಬಾರಿ ಕೊಹ್ಲಿ ಸೇರಿದಂತೆ ಹಿರಿಯ ಆಟಗಾರರೊಂದಿಗೆ ನಡೆಸಿದ ಸಂಭಾಷಣೆಯನ್ನು ಲೀಕ್ ಮಾಡಿದ್ದಾರೆ ಎಂದು ಆಂಗ್ಲ ಪತ್ರಿಕೆಯೊಂದು ವರದಿ ಮಾಡಿದೆ.
ಇದು ಕೂಡಾ ಕೊಹ್ಲಿ-ಕುಂಬ್ಳೆ ನಡುವಿನ ವೈಮನಸ್ಯಕ್ಕೆ ಒಂದು ಕಾರಣ ಎಂದು ಪತ್ರಿಕೆ ವಿಶ್ಲೇಷಿಸಿದೆ. ಏನೇ ಆದರೂ, ಈ ಎಲ್ಲಾ ಆರೋಪಗಳಿಗೆ ಸ್ವತಃ ಕುಂಬ್ಳೆ ಸ್ಪಷ್ಟನೆ ನೀಡುವವರೆಗೂ ಆರೋಪಗಳು ನಿಲ್ಲುವ ಸೂಚನೆ ಕಾಣುತ್ತಿಲ್ಲ.
ತಾಜಾ ಸುದ್ದಿಗಳನ್ನು ಓದಲು ವೆಬ್‌ದುನಿಯಾ
ಮೊಬೈಲ್ ಆ್ಯಪ್ ಡೌನ್‍ಲೋಡ್ ಮಾಡಿಕೊಳ್ಳಿ
