ಟೀಂ ಇಂಡಿಯಾ ಎದುರು ಸೋತರೂ ಐರ್ಲೆಂಡ್ ಖುಷಿ ಪಡಲು ಕಾರಣವಿತ್ತು!

ಡುಬ್ಲಿನ್: ಟೀಂ ಇಂಡಿಯಾ ಆಂಗ್ಲರ ನಾಡಿನಲ್ಲಿ ಮೊದಲ ಪಂದ್ಯದಲ್ಲೇ ಶುಭಾರಂಭ ಮಾಡಿದೆ. ಐರ್ಲೆಂಡ್ ವಿರುದ್ಧ ಮೊದಲ ಟಿ20 ಪಂದ್ಯವನ್ನು 76 ರನ್ ಗಳಿಂದ ಗೆದ್ದು ಸರಣಿಯಲ್ಲಿ ಮುನ್ನಡೆ ಪಡೆದಿದೆ.

ಈ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಭಾರತ ಶಿಖರ್ ಧವನ್ ಮತ್ತು ರೋಹಿತ್ ಶರ್ಮಾ ಅಬ್ಬರಕ್ಕೆ ನಿಗದಿತ 20 ಓವರ್ ಗಳಲ್ಲಿ 5 ವಿಕೆಟ್ ನಷ್ಟಕ್ಕೆ 205 ರನ್ ಗಳಿಸಿತು. ರೋಹಿತ್ 61 ಎಸೆತಗಳಲ್ಲಿ 5 ಸಿಕ್ಸರ್ ಗಳೊಂದಿಗೆ 97 ರನ್ ಗಳಿಸಿ ಸ್ವಲ್ಪರದಲ್ಲೇ ಶತಕ ಮಿಸ್ ಮಾಡಿಕೊಂಡರು. ಧವನ್ ಆರಂಭದಿಂದಲೇ ಅಬ್ಬರಿಸಿ 45 ಎಸೆತಗಳಲ್ಲಿ 5 ಸಿಕ್ಸರ್ ಗಳೊಂದಿಗೆ 74 ರನ್ ಗಳಿಸಿ ಔಟಾದರು.

ಅದಾದ ಬಳಿಕ ಧೋನಿ, ರೈನಾ, ನಾಯಕ ವಿರಾಟ್ ಕೊಹ್ಲಿ ಕಳಪೆ ಮೊತ್ತಕ್ಕೆ ಔಟಾದರು. ಅದರಲ್ಲೂ ಕೊಹ್ಲಿಯನ್ನು ಶೂನ್ಯಕ್ಕೆ ಔಟ್ ಮಾಡಿ ಐರ್ಲೆಂಡ್ ಪಡೆ ದೊಡ್ಡ ಸಾಧನೆಯನ್ನೇ ಮಾಡಿತು. ಹೀಗಾಗಿ ಸೋಲಿನಲ್ಲೂ ಅದು ಸಂಭ್ರಮಿಸುವುದಕ್ಕೆ ಇದೇ ಕಾರಣವಾಯಿತು.

ನಂತರ ಮೊತ್ತ ಬೆನ್ನತ್ತಿದ ಅತಿಥೇಯರಿಗೆ ಭಾರತದ ಸ್ಪಿನ್ ಜೋಡಿ ಕುಲದೀಪ್ ಯಾದವ್ (3 ವಿಕೆಟ್) ಮತ್ತು ಯಜುವೇಂದ್ರ ಚಾಹಲ್ (4 ವಿಕೆಟ್) ಕಾಡಿತು. ಇವರಿಬ್ಬರ ಸ್ಪಿನ್ ಮೋಡಿಗೆ ತತ್ತರಿಸಿದ ಕ್ರಿಕೆಟ್ ಶಿಶುಗಳು 9 ವಿಕೆಟ್ ನಷ್ಟಕ್ಕೆ ಕೇವಲ 132 ರನ್ ಗಳಿಸಲಷ್ಟೇ ಶಕ್ತರಾದರು. ಈ ಗೆಲುವಿನೊಂದಿಗೆ ಭಾರತ ಸರಣಿಯಲ್ಲಿ 1-0 ಅಂತರದ ಮುನ್ನಡೆ ಸಾಧಿಸಿತು.

ತಾಜಾ ಸುದ್ದಿಗಳನ್ನು ಓದಲು ವೆಬ್ ದುನಿಯಾ ಮೊಬೈಲ್ ಆಪ್ ಡೌನ್ ಲೋಡ್ ಮಾಡಿಕೊಳ್ಳಿ.