ಮುಂಬೈ:ಬಾಲಿವುಡ್‌ ನಟಿ ದೀಪಿಕಾ ಪಡುಕೋಣೆ ಹಾಗೂ ಟೆನಿಸ್‌ನ ಮಾಜಿ ವಿಶ್ವ ನಂ.1 ತಾರೆ ನೊವಾಕ್‌ ಜೊಕೋವಿಕ್ ಡೇಟಿಂಗ್ ಮಾಡುತ್ತಿದ್ದಾರೆ ಎಂಬ ಸುದ್ದಿ ಈಗ ಎಲ್ಲೆಡೆ ಹರಿದಾಡತೊಡಗಿದೆ. 2014ರಲ್ಲೇ ಈ ಬಗ್ಗೆ ಗುಸು ಗುಸು ಇದ್ದರೂ ಇದೀಗ ಜೊಕೊ ಮಾಜಿ ಗೆಳತಿ ನತಾಶಾ ಬೆಕ್ಲಾವಕ್‌ ನೇರಾನೇರ ಆರೋಪ ಮಾಡುವುದರೊಂದಿಗೆ ವಿಶ್ವಮಟ್ಟದಲ್ಲಿ ಸದ್ದು ಮಾಡಿದೆ.
ಸರ್ಬಿಯಾದ ಜೊಕೋವಿಕ್ ಮಾಜಿ ಗೆಳತಿ, ಪಾಪ್‌ ಗಾಯಕಿ ನತಾಶಾ ಬೆಕ್ಲಾವಕ್‌ ಸಂದರ್ಶನವೊಂದರಲ್ಲಿ ಈ ಬಗ್ಗೆ ಮಾಹಿತಿ ನೀಡಿದ್ದಾರೆ. ತನ್ನ ಮತ್ತು ಜೊಕೊ ನಡುವಿನ ಸಂಬಂಧ ಮುರಿದ ನಂತರ, ಜೊಕೊ ದೀಪಿಕಾ ಜತೆಗೆ ಡೇಟಿಂಗ್ ನಡೆಸುತ್ತಿದ್ದರು. ಇದೇ ವೇಳೆ ಜೊಕೊ ತಮ್ಮ ಹಾಲಿ ಪತ್ನಿ ಜೆಲೆನಾ ರಿಸ್ಟಿಕ್ ಜತೆಯೂ ಸಂಬಂಧವಿಟ್ಟುಕೊಂಡಿದ್ದರು ಎಂದು ನತಾಶಾ ಆರೋಪಿಸಿದ್ದಾರೆ.
ಜೊಕೋವಿಕ್-ದೀಪಿಕಾ ಮೊದಲು ಪರಿಚಿತರಾ ದದ್ದು 2014ರಲ್ಲಿ. ಮಹೇಶ್‌ ಭೂಪತಿ ಮಾಲಕತ್ವದ ಅಂತಾರಾಷ್ಟ್ರೀಯ ಪ್ರೀಮಿಯರ್‌ ಟೆನಿಸ್‌ ಲೀಗ್‌ನಲ್ಲಿ ಆಡಲು ಜೊಕೊ ಭಾರತಕ್ಕೆ ಬಂದಿದ್ದರು. ಈ ಸಂದರ್ಭದಲ್ಲಿ ಜೊಕೊ ಮತ್ತು ದೀಪಿಕಾ ಗೆಳೆತನ ಸಂಪಾದಿಸಿದ್ದರು. ಇವರಿಬ್ಬರು ಗಾಸಿಪ್‌ಗೆ ಆಹಾರವಾಗಿದ್ದು 2016 ರಲ್ಲಿ. ದೀಪಿಕಾ ಹಾಲಿವುಡ್‌ ಚಿತ್ರ "ಎಕ್ಸ್‌ಎಕ್ಸ್‌ಎಕ್ಸ್‌' ಚಿತ್ರದ ಶೂಟಿಂಗ್‌ಗಾಗಿ ಅಮೆರಿಕದಲ್ಲಿದ್ದರು. ಇದೇ ಸಂದರ್ಭದಲ್ಲಿ ಜೊಕೊ ಮತ್ತು ದೀಪಿಕಾ ರೆಸ್ಟೋರೆಂಟ್‌ವೊಂದರಲ್ಲಿ ಡಿನ್ನರ್‌ ಪಾರ್ಟಿ ಮಾಡಿರುವುದು, ಇಬ್ಬರು ಜತೆಯಾಗಿ ಓಡಾಡುತ್ತಿರುವ ಫೋಟೋಗಳು ಸಾಮಾಜಿಕಜಾಲತಾಣದಲ್ಲಿ ಹರಿದಾಡುತ್ತಿದ್ದವು. ಇದು ಈಗ ಜೋಕೋವಿಕ್ ಮತ್ತು ದೀಪಿಕಾ ನಡುವಿನ ಡೇಟಿಂಗ್ ವಿಷಯಕ್ಕೆ ಇನ್ನಷ್ಟು ಇಂಬುಕೊಟ್ಟಿದೆ.
